Ministru Negósius Estranjeirus no Kooperasaun Dionísio da Costa Babo Soares. Imajen Egas Cristovão

DILI, 15 maiu 2019 – Ministériu Negósiu Estranjeiru no Kooperasaun (MNEK), Dionísio Babo Soares, kinta (16/05) sei hala’o vizita ofisiál ba nasaun membru ASEAN (Organizasaun Nasaun Sudeste Aziátika-sigla inglés) hodi hakbesik liután Timor-Leste ba ASEAN no lori ASEAN mai Timor-Leste.

“Hanesan nasaun ida koloka iha parte aziátiku, Timor-Leste presiza iha relasaun no kooperasaun di’ak ho nasaun seluk,” informa ministru Dionísio Babo Soares, tuir komunikadu imprensa, TATOLI asesu iha edifísiu MNEK, Praia dos Coqueiros, kuarta (15/05).

Xefe Diplomasia ne’e mós informa, bazeia ba polítika externa governu Timor-Leste nian katak Timor-Leste nia prioridade primeiru liu maka atu sai membru ba organizasaun ASEAN, tanba ne’e “Tour ASEAN” ne’e sei vizita ba sekretariadu ASEAN iha Jakarta, hafoin kontinua vizita ba Tailándia ne’ebé asume hela prezidénsia ba organizasaun ASEAN tinan ida ne’e.

“Timor-Leste mós sai ona uma na’in ba nasaun ASEAN sira hanesan Indonézia, Malázia, Filipina, Tailándia, Singapura, no Vietnam, ho ida ne’e Timor-Leste rasik mós iha ona kooperasaun di’ak nasaun membru ASEAN sira ne’e, liu-liu ho investimentu ne’ebé maka signifikativu tebes husi nasaun ASEAN sira hanesan Telekomunikasaun Vietnam, Bank Rakyat Indonesia (BRI), Bank Mandiri rasik”.

“Alende ne’e Timor-Leste mós sai uma na’in ba Singapore Clinic Stamford, no hala’o mós Investimentu komérsiu ho nasaun ASEAN ho valór bilhões de dolar,” refere komunikadu ne’e.

Tuir komunikadu ne’e, diplomata timoroan ne’e sei hasoru malu ho mós nia omólogu Ministru Negósiu Estranjeiru husi nasaun sanulu ne’ebé inklui ona iha membru ASEAN hodi hala’o enkontru bilaterál atu bele hametin liután kooperasaun bilaterál Timor-Leste no nasaun Aziátiku sira iha kontestu estadu ho estadu nune’e mós entre povu ho povu.

Notísia relevante: http://www.tatoli.tl/2018/08/mnek-enkontru-ho-membru-asean-atualiza-infrormasaun-kona-ba-adezaun-tl/

Jornalista       : Nelia Rosario

Editór             : Rafy Belo 

HAKEREK NO HATÁN

Please enter your comment!
Please enter your name here