Ministra Finansa en ezersísiu, Sara Lobo Brités, Imajen/Egas Cristovão

DILI, 15 maiu 2019 (TATOLI)-Ministra Finansa ein funsaun, Sara Lobo Brites, ohin, distribui ona kalendáriu ba Orsamentu Jerál Estadu (OJE) 2020 ba elenku governamentál sira para tenke prepara data indikativu para ministru sira informadu kona-ba ba faze preparasaun.

“Ita tenke submete orsamentu ba iha Parlamentu iha loron 15 outubru, ita tenke aloka kedan data sira. Ne’ebé, ohin, sirkula ona ba ministru sira para bele extende informasaun ba sira-nia tékniku sira para bele apár hela ho data”, informa Sara Lobo Brites, ohin, iha Palásiu Governu hafoin reuniaun Konsellu Ministru.

Kona-ba montante OJE ne’e, Sara Lobo Brites esklarese, seidauk tanba foin iha preparasaun, no rekolla programa no prioridade husi ministériu sira tanba sei aprova uluk sira-nia prioridade ne’ebé hakarak atu finansia iha 2020.

“Depois mak ita foin halo nia pakote fiskál. Konserteza senáriu iha mas to’o agora ami seidauk bele pronunsia tanba ita hakarak Governu tomak, ministériu sira hakarak fó prioridade ba ida ne’ebé”.

Sobre ezekusaun orsamentu 2019 nian, atuál Vise-Ministra Finansa relata iha soru-mutu Konsellu Ministru, Primeiru-Ministru mós husu para ministériu ida-idak ezekuta sira-nia osan tanba ezekusaun ladún sa’e.

“Agora ita tama ona ba preparasaun orsamentu 2020, ita lakohi to’o iha fin ano mak foin atu aselera fali ezekusaun, ne’ebé mensajen ne’e fó ona ministériu ida-idak para aselera ida-idak nia parte”.

Tuir portál transparénsia Timor-Leste nian, ezekusaun OJE 2019 to’o ohin loron iha porsentu 29.2 husi nia montante orijen US$1,482,000,000.00.

Jornalista   : Maria Auxiliadora

Editór         : Francisco Simões

 

HAKEREK NO HATÁN

Please enter your comment!
Please enter your name here