Ministru Negósius Estranjeirus no Kooperasaun, Dionísio da Costa Babo Soares. Imajen/Antonio Gonçalves

DILI, 15 maiu 2019 (TATOLI)-Lista nomeiasaun diplomata hodi reprezenta estadu iha rai li’ur hetan ona aprovasaun iha Konsellu-ministru no lori ona ba Prezidente Repúblika (PR), Francisco Guterres, Lú Olo maibé rezultadu seidauk fó sai. Tanba ne’e, Ministériu Negósiu Estranjeiru no Kooperasaun (MNEK) sei hein desizaun ikus husi PR tanba kompeténsia iha PR.

“Lista naran sira ne’e hetan hotu ona aprovasaun husi Konsellu-Ministru maibé sei hein hela desizaun ikus Prezidente Republika nian,” informa Ministru Dionísio Babo Soares, iha Palásiu Governu, kuarta (15/05).

Ministru Dionísio Babo mós hateten, husi lista naran sira ne’ebé maka iha ona, inklui diplomata sira ne’ebé maka nomea bazeia ba karreira nune’e mós iha diplomata ne’ebé maka nomeasaun polítika.

Tanba ne’e, bainhira lista ne’e hetan ona konkordánsia husi PR, sira mós  sei hetan kursu ida hanaran kursu Indusaun; kursu ida ne’e rekoñese hanesan kursu orientasaun kona-ba diplomasia.

Governante ne’e mós haktuir katak, uluk diplomata sira haruka ba iha Malázia no rai seluk hodi tuir formasaun maibé agora halo de’it iha rai laran.

Ministru Dionísio Babo mós esplika, diplomata sira ne’ebé mak ramata ona sira-nia serbisu iha rai li’ur ho nomeiasaun husi MNEK no hanesan mós funsionáriu públiku. Nune’e, bainhira fila fali mai sei kontribui serbisu, nafatin iha MNEK tuir sira-nia kareira. Maibé, diplomata sira ne’ebé nomeiasaun polítika sei fila fali ba vida normál.

Iha biban hanesan, lider diplomata timoroan ne’e informa mós perante jornalista sira katak tuir planu MNEK nian, iha futuru, diplomata seniór ka eis-diplomata sira mak sei sai formadór ba iha futuru diplomata sira ka diplomata foun sira.

Notísia relevante: http://www.tatoli.tl/2019/05/lista-nomeasaun-embaixador-foun-aprova-ona-iha-konsellu-ministru/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here