DILI, 15 maiu 2019 (TATOLI)—Institutu Politékniku Betano (IPB) sei sai referénsia ba politéknika foun ne’ebé atu harii iha Lospalos no Manatuto.
“Iha tinan 2020, governu fó prioridade ba Betano atu moderniza no sai hanesan referénsia molok atu hahú obra iha Lospalos no Manatuto,” Ministru Ensiñu Superiór, Siénsia no Kultura (MESSK), Longuinhos dos Santos, ko’alia ba jornalista sira iha Palásiu Governu, kuarta (15/5/2019).
Nia esplika, tuir Planu Estratéjiku Dezenvolvimentu Nasionál (PEDN) 2011-2030, defini prosesu dezenvolvimentu ensiñu superiór hodi asesu iha ensiñu superiór públiku nian.
Longuinhos informa, politéknika Betano oras ne’e hahú prepara-aan hodi haforsa liu-tan tuir PEDN mak Lospalos, Manatuto, Betano no Suai.
“Lospalos haree liu-ba otél no turizmu akademia, Manatuto sai hanesan akademia peska no estudu mariñu. Betano haree liu-ba produsaun animál no kontrusaun sivíl,” governante ne’e esplika.
Ministru ne’e haklaken katak polítika governu atu aumenta politéknika iha fatin hirak ne’e ho objetivu atu minimiza konsentrasaun númeru estudante iha kapitál Dili.
Totál númeru ensiñu superiór hamutuk 11 tantu privadu no públiku mak hetan akreditasaun hodi hala’o prosesu aprendijazen.
Jornalista: Evaristo Soares Martins
Editór: Xisto Freitas