Ministru Ensiñu Superiór, Siénsia no Kultura, Longuinhos dos Santos. Imajen/Egas Cristóvão

DILI, 15 maiu 2019 (TATOLI)—Governu liuhusi Ministériu Ensiñu Superiór, Siénsia no Kultura (MESSK), promete sei rezolve bolseiru sira ne’ebé durante ne’e governu haruka ba eskola maibé fila hikas hosi akaba estudu la uza.

Ministru Ensiñu Superiór, Siénsia no Kultura, Longuinhos dos Santos, hateten oras ne’e ministériu halo hela aliñamentu ida ho benefisiáriu hosi bolsu sira para kria estájiu profisionál ba sira.

Nia esklarese katak estájiu ne’e sei hala’o iha liña ministeriál inklui empreza nasionál ne’ebé akreditadu para sira (estajiáriu) bele gaña sira-nia esperiénsia no sira iha komportamentu di’ak.

“Ida ne’e mak meiu ka polítika ne’ebé uza hosi Ministériu Ensiñu Superiór, Siénsia no Kultura. Agora dadaun ministériu realiza ona benefisiáriu bolsa sira ne’ebé ami identifika para haruka sira estájiu,” Longuinhos dos Santos ba jornalista sira iha Palásiu Governu, kuarta (15/5/2019).

Nia esplika, ministériu relevante sei haree ba fatin estratéjiku hanesan área enjeñaria atu fó formasaun no mós haree liu-ba iha agrikultura no turizmu.

“Ida ne’e área estratéjiku ne’ebé ita atu fó prioridade ba timoroan sira, liliu sira ne’ebé ramata ona sira-nia estudu ka benefisiáriu bolsa sira ne’e,” Longuinhos informa.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here