Uma-lulik Timor. Imajen: espesiál

DILI, 15 maiu 2019 (TATOLI)—Governu liuhusi Sekretariu Estadu Arte no Kultura (SEAK), hahú primeiru Governu Konstitusionál to’o agora sempre fó atensaun no protesaun ba Uma-Lulik sira iha Timor-Leste liuhusi fó apoiu orsamentu ba inaugurasaun uma-lulik sira.

Agora, iha VIII Governu Konstitusionál, Governu fó liu atensaun ba uma-lulik sira ne’ebé maka SEAK tau tiha ona ba planu anuál 2020 ne’e. Uma-lulik sira ne’e, na’in sira maka halo hafoin governu fó atensaun no fó protesaun.

“Buat ida uma-lulik ne’e ita nian, la’ós governu nian. Ita maka na’in ba uma lulik ida ne’e. Protesaun ne’e maka ami sensibiliza nafatin lia-na’in sira, joven sira, estudante sira katak sira no governu fó protesaun ba ita-nia uma-lulik sira ne’e. Tanba ita-nia kultura ne’e moris. Moris hela ho ita loro-loron,” Diretora Jerál Kultura hosi Sekretaria Estadu Arte no Kultura, Cecília Maria Belo de Assis, ba jornalista TATOLI liuhusi entrevista ne’ebé hala’o iha nia kna’ar fatin, Avenida Portugal, Dili, kuarta (15/5/2019).

Hosi primeiru Governu to’o VIII Governu Konstitusuionál, nia haktuir, Governu Timor-Leste fó ona apoiu ba uma-lulik hamutuk 125 ne’ebé kada uma-lulik ida hetan orsamentu entre $1.500 to’o $2000. Tinan ida ne’e, governu iha planu atu fó apoiu bazeia ba proposta hosi komunidade sira hamutuk 60 resin, ne’ebe komunidade sira hatama iha tinan 2018 to’o agora.

Atu hili no fó prioridade ba proposta sira ne’e, Cecília esklarese, sei iha responsável hosi SEAK ne’ebé tún ba kampu halo verifikasaun hodi haree ba proposta ne’e. Prezidente munisípiu, xefe suku no xefe aldeia sira asina ka lae, hafoin liuhusi koordenasaun maka fó apoiu.

Tanba, nia hatutan, apoiu refere uza osan hosi Transferénsia Públika nian entaun governu  sei selebra kontratu ho proposta-na’in sira ne’e. Orsamentu Transferénsia Públika ba tinan ida ne’e, ne’ebé atu fó apoiu ba uma-lulik no grupu kulturál sira hamutuk $42.000.

“Iha ne’e, ami forma komisaun ida ne’ebé kompostu hosi ema na’in lima. Ami haree hotu dokumentu sira ne’e, sira priénxe ona kritéria ka lae. Tanba bainhira ita hasai osan hosi Transferénsia Públika ne’e, ita tenke selebra kontratu ho sira. Sira-nia kartun eleitorál loos ka lae, konta bankária tenke loloos, tanba ita transfere osan ba sira liuhusi konta bankária,” diretora ne’e esplika.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here