DILI, 15 maiu 2019 (TATOLI)-Ministru Estadu Prezidénsia Konsellu-Ministru, Hermenegildo Augusto Cabral Pereira informa katak reuniaun Konsellu-Ministru (KM) aprova ona prosedimentu konkursu públiku ba fornesimentu kombustivel ba sentrál elétrika Hera no Betanu.

“Konsellu-Ministru aprova konkursu públiku ba fornesimentu kombustivel ba sentrál elétrika Hera no Betano,” informa Ministru Hermenegildo Pereira ba jornalista sira iha Palásiu Governu, kuarta (15/05).

Governante ne’e haktuir, Ministru Obras Públika, Salvador Soares dos Reis Pires no Komisaun Nasionál Aprovizionamentu (CNA-sigla portugés) halo aprezentasaun no propoin ba Konsellu-Ministru atu hatán tipu aprovizionamentu oinsá mak liga ho prosesu legál no liu vistu préviu husi Kámara Kontas (CdC-sigla portugés), maske nune’e hafoin debate kle’an ezekutivu sira aprova.

Aprovasaun prosedimentu ne’e atu fornese kombustivel ba sentrál elétrika rua ba tinan ne’e, hahú iha fulan outubru 2019 to’o setembru 2020.

Antes ne’e, KM aprova Proposta Kontratu Estensaun Ba Kompaña SAKOM no Esperansa Timor Oan (ETO) hodi kontinua fornesse kombustivel ba sentrál elétrika Hera no Betanu to’o setembru 2019.

Tuir kontratu, Governu ho kompaña fornese kombustível vigor iha loron 22 Junho 2017 no termina iha marsu 2019, tanba ne’e Governu dezde estende to’o setembru 2019.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here