Diretór Jerál Servisu Operesionál no Protesaun Sivíl (DJ-SOPS), Superintendente Asistente Polísia, Ismael da Costa Babo ho funsionáriu sira oberva kondisaun servisu iha diresaun tomak Protesaun Sivíl no Bombeiru. Imajen Tatoli/Eugénio Pereira

DILI, 15 maiu 2019 (TATOLI)—Hafoin simu pose, Diretór Jerál Servisu Operasionál no Protesaun Sivíl (DJ-SOPS), Superintendente Asistente Polísia, Ismael da Costa Babo, hahú hala’o servisu hodi observa kondisaun servisu fatin iha diresaun tomak Protesaun Sivíl no Bombeiru nian.

Iha observasaun ne’e, Ismael ho ekipa buka maneira sei halo reabilitasaun emerjénsia edifísiu Protesaun Sivíl no Bombeiru hodi bele fasilita ambiente di’ak ba espasu liña servisu funsionáriu inklui gabinete Sekretáriu Estadu Protesaun Sivíl (SEPS), Alexandrinho Xavier Araújo ho ekipa.

“Ami mai identifika kondisaun ho orsamentu ne’ebé iha bele reabilita edifísiu hodi fahe ba kada divizaun departamentu ida-idak nian bele servisu ho kondisaun no organizadu,” dehan Ismail Babo ba Agência Tatoli iha edifísiu Bombeiru, Caicoli, Dili, horisehik.

Nia kria ona planu ba futuru sei halo edifísiu foun ba Protesaun Sivíl nian ne’ebé presiza harii iha dook hosi sidade Dili hanesan iha foho leten, Dare.

“Ita hakarak koloka edifísiu foun iha foho lente dook uituan hosi Dili, nune’e ba futuru ita bele instala sistema alerta ba dezastre oioin ne’ebé karik akontese ita bele halo prevensaun,” nia informa.

Babo esplika, edifísiu ne’e sei sai mós sentru protesaun, nune’e karik asidente ruma iha Dili hanesan tsunami akontese, ekipa bele salva povu ba hela provizóriu iha fatin ne’e no sentru ne’e sai sentru formasaun ba Protesaun Sivíl rasik no ba estudante sira ne’ebé hakarak apriende buat ruma hosi servisu protersaun sivíl bele vizita.

Nia salienta katak programa seluk tan maka importante sei hasa’e no kapasita rekursu umanu ekipa atu responde ba problema dezastre oioin ne’ebé akontese iha Timor-Leste.

“Ha’u ba ho funsaun vizaun no misaun ida maka atu mellora kondisaun importante ba nasaun liliu atu salva nasaun no povu hosi risku ba dezastre,” katak nia.

Iha parte seluk, Ismail mós sei buka rezolve problema rekursu umanu no problema fasilidade servisu ne’ebé iha bele hadi’a liu-tan.

Tuir nia, ohin loron iha mundu tomak funu laiha ona, no funu boot ne’ebé akontese iha mundu mak dezastre naturál, tsunami, anin boot, rai halai, ahi han uma no bee tama povu nian uma, dezastre asidente aviaun monu, asidente marítima (ró mout) iha tasi no seluk tan sai problema jerál mundu nian atu rezolve.

 Ho problema sosiál sira ne’e hotu, nia tenik, hateke ba mundu ohin loron, kna’ar Protesaun Sivíl importante hadi’a kondisaun servisu.

“Problema no asidente sira ne’e sai preokupasaun boot ba mundu oinsá mak ita prepara rekursu atu responde evita asidente hirak ne’e,” nia hatete.

Ba futuru, Babo afirma, governu sei integra servisu ekipa  Diresaun Nasionál Seguransa Patrimóniu Públiku (DNSP), Diresaun Risku Dezastre Naturál (DRDN), Diresaun Administrasaun Finansa Protesaun Sivíl (DAFPS), Diresaun Nasionál Prevensaun Konflitu (DNPF) no Diresaun Nasionál Seguransa Rodoviáriu (DNSR) atu servisu hamutuk.

 “Diresaun sira ne’e hotu sei integra sai ida de’it hanesan intrumentu protesaun sivíl hodi iha efikásia no efisiénsia utiliza rekursu no ekipamentu servisu ho didi’ak liu-tan no responde ba ajuda dezastre ba ho rekursu sufisiente,” nia esklarese.

Programa seluk, nia salienta, sei prevé osamentu hodi sosa karreta ba Bombeiru iha tinan 2020 tanba kondisaun karreta Bombeiru nian agora barak maka aat ona. Aleinde ida ne’e, ba futuru sei koordena ho PNTL, F-FDTL, Kruz Vermellha Timor-Leste no ajénsia internasionál sira atu servisu hamutuk responde ba kualker dezastre.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here