Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 15 maiu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete kona-ba projetu Avansa Agrikultura ne’ebé implementa iha munisípiu lima hetan progresu ne’ebé di’ak.

“Dalaruma ita haree modo ne’ebé barak tun mai to’o Dili laran ne’e hosi ita-nia programa sira ne’ebé ita hala’o”, informa Ministru Joaquim José  Gusmão dos Reis Martins, ohin, hafoin soru-mutu Konsellu Ministru iha Palásiu Governu.

Bá oin Ministériu Agrikultura no Peska (MAP) hakarak haree liu ba área ne’ebé boot ne’ebé identifika ona atu bele hala’o atividade sira iha terrenu.

Avansa Agrikultura implementa iha munisípiu Ainaro, Aileu, Liquiçá, Ermera, Bobonaro no Dili, dezde 2015 to’o 2020.  Avansa Agrikultura mak USAID nia projetu ne’ebé parseria ho Ministériu Agrikultura no Peska ho objetivu atu aselera kreximentu ekonómiku ne’ebé inkluzivu no sustentável iha setór agrikultura. Depois de projetu ne’e remata, USAID antesipa katak kuaze populasaun hamutuk 33,000 iha suku 250 sei hetan valor rendimentu ne’ebé maka’as, realiza hadi’a ba nutrisaun, no maneja sira-nia ativu ekonomia bele efetivu liu tan.

Tuir publikasaun USAID katak, lala’ok Avansa Agrikultura implementa tuir etapa aproximasaun, harii lukru dezenvolvimentu husi projetu uluk no uza pilotu intervensaun foun. Projetu sei komesa nia atividade husi komunidade uitoan ba tinan primeiru no depois habelar susesu de intervensaun hodi kobre númeru komunidade ne’ebé mak trajetu ona durante tinan lima nia laran. Avansa Agrikultura mós uza métodu de aprendizajen liuhusi peskiza bá oin hodi avalia efisiénsia no efikás, projetu hala’o ajustamentu kuandu presiza.

Diretora Ajénsia Estadu Unidu ba Dezenvolvimentu Nasionál (USAID- siglainglés), Diana B. Putman, hatete, projetu ne’e implementa iha munisípiu lima no razaun hili munisípiu sira ne’e tanba sira iha klima ne’ebé di’ak ba produsaun modo no sai fatin ne’ebé di’ak atu halo produsaun ba ai-han sira ne’e.

“Modo sira ne’ebé prodús iha ne’ebá mak modo sira ne’ebé lori mai iha Dili no ita sosa fali hodi han iha sidade laran”, Diana dehan iha ámbitu serimónia asinatura ba revizaun da-neen ba Akordu Bilaterál Objetivu Dezenvolvimentu (DOAG) entre Ministériu Finansa ne’ebé reprezenta Governu Timor-Leste no USAID iha salaun Ministériu Finansa, horisehik.

Iha asinatura revizaun daneen ne’e, Governu Estadu Unidu liuhosi USAID aumenta tan millaun US$16.85 ba DOAG ne’ebé sei gasta fundu ne’e ba atividade hanesan avansa agrikultura, projetu turizmu ba ema hotu (2018-2023), hasa’e reziliénsia komunidade iha Oekusi (2015-2020), hakbiit servisu saúde bázika (2015-2020), atividade haforsa eleisaun inkluziva no prosesu polítiku (2016-2019) no projetu reforma Aduaneira (2017-2019).

Ministru Agrikultura dehan, hosi montante osan millaun US$16.85 ne’e seidauk hatene montante hira maka sei monu ba Ministériu Agrikultura, maibé sei iha koordenasaun.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here