Institutu Defeza Nasionál (IDN) ensera formasaun primeira semana hodi lori Xefe suku na’in 25 hala’o vizita ba Sentru Formasaun Akademia Polísia Nasionál Timor-Leste (PNTL) no edifisiu Bombeiru iha Comoro, Dili. FOTO: IDN

DILI, 13 maiu (TATOLI)—Institutu Defeza Nasionál (IDN) ensera formasaun primeira semana hodi lori xefe suku na’in 25  hala’o vizita ba Sentru Formasaun Akademia Polísia Nasionál Timor Leste (PNTL) no edifísiu Bombeiru iha Comoro, Dili, sesta (11/05).

Durante oras rua ho balun vizita institusaun Estadu rua ne’e, delegasaun xefe suku sira akompaña hosi koordenadór kursu  IDN-TL, Nuno Carvelo Sarmento, formadór Guelherme Soares no asesór jurídiku, António Alves.

Iha Sentru Formasaun Polísia Akademia Comoro, delegasaun xefe suku sira simu direta hosi Komandante  Rekursu Umanu PNTL Sentru Formsaun Comoro, Superintendente Asistente,  Emílio dos Santos hodi  esplika matéria ho ekipamentu bainhira fó formasaun ba ajente rekrutadu foun sira, inklui papél xefe suku hasai karta deklarasaun ba joven sira bainhira ba teste serbisu ruma.

Iha estasaun Bombeiru  Comoro, delegasau xefe simu direta hosi Komandante Bombeiru,  Paulo Maia, hodi espelika funsaun ekipamentu iha Bombeiru hodi kombate inséndiu inklui ekipamentu ba kombate inséndiu.

Xefe Suku Mantasi, Postu Administrativu Ainaro Vila, Munisipiu Ainaro, Manuela da Silva Caldas,  agradese ba IDN tanba durante loron lima kapasita ona sira iha área seguransa defeza nasionál.

“Formasaun ne’e lori benifísiu mai ha’u, tanba durante iha terrenu ami implementa hela, maibé seidauk to’o. Maibé ho formasaun hosi IDN-TL kona-ba defeza nasionál, edukasaun sidadania no formasaun kona-ba serbisu Bombeiru aumenta ami nia koñesimentu kle’an hodi fila ba implementa iha ami nia suku ida-idak,” nia haktuir.

Iha fatin hanesan, Xefe Suku Alaua-Leten, Postu Administrativu Baguai, Munisipiu Baucau, Jeferino Joaquim Ximenes mós agradese ba IDN tanba bele fasilita formasaun ne’e.

“Formasaun ne’e importante tebes ba ami. Sai bukae ba ami hodi implementa iha ami nia suku,”  nia tenik.

Tuir nia, matéria ne’ebé sira hetan hosi formadór nasionál sira, fó hanoin ba autoridade sira ukun komunidade iha ámbitu estabilidade nasionál.

Ikus liu, Koordenadór Formasaun IDN-TL, Nuno Cavelo Sarmento, akresenta  formasaun  primeira semana ba xefe suku sira termina iha sesta semana kotuk, nune’e ba oin IDN-TL sei hala’o avalisaun ba formasaun ne’ebé hato’o hosi formadór sira adekuadu ho realidade iha terenu ka lae.

Intensaun hosi avaliasaun ne’e atu IDN-TL bele hadi’a karik iha lakuna (failansu) balun hodi hadi’a ba formasaun segunda semana tuir mai.

Nia hatutan, IDN-TL lori autoridade suku sira ne’e vizita ba akademia PNTL ho Bombeiru  atu xefe suku sira iha koñesimentu kompleta matéria teoria sira ne’ebé oradór hosi institusaun rua hanorin.

Intensaun seluk, koordenadór kursu ne’e haklaken, oinsá xefe suku sira hatene uituan selesaun ba kandidatu polísia foun sira inklui rekezitu balun ne’ebé xefe suku sira tenke halo hodi fasilita joven sira bainhira mai teste polísia.

 “IDN-TL iha esperansa boot tebes ho formsaun xefe suku ba primeira semana ne’e, hariku mós autoridade lokál sira nia koñesimentu hodi solusiona problema jestaun lideransa ne’ebé durante sira infrenta,” Nuno dehan.

Formasaun ba segunda semana sei hahú  iha semana oin, iha ne’ebé sei konvida tan xefe suku hamutuk 25, to’o tarjetu IDN-TL kompleta formadu xefe suku 250 ba etapa primeiru no matéria formasaun sei ligadu siguransa defeza nasionál no etapa daruak sei involve tan xefe suku 202 hodi kompleita xefe suku 452.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here