Sekretáriu Estadu Arte no Kultura, Teófilo Caldas. Imajen Tatoli/António Gonçalves

DILI, 14 maiu 2019 (TATOLI)—Sekretáriu Estadu Arte no Kultura reprezenta Governu Timor-Leste liliu reprezenta Minsitru Superiór Siénsia no Kultura, sei partisipa reuniaun entre nasaun Komunidade Nasaun Ko’alia Lian Portugés (CPLP-sigla portugés) ba dala XI iha Cavo-Verde ne’ebé sei deskuti kona-ba arte no kultura.

Partisipasaun Timor-Leste nian ba iha désimu primeiru reuniaun entre nasaun CPLP iha Cavo-Verde ne’e, realiza iha loron tolu nia laran ne’ebé sei hahú hosi loron 10-12 abríl 2019. Iha reuniaun ka asembleia ne’e, Timor-Leste sei ko’alia kona-ba estabelesimentu Akademia Arte Indústria Kriativu Kulturál, uma-lulik no nomesaun tais Timor-Leste sai patrimóniu mundiál.

“Iha ne’ebá, ha’u reprezenta Ministru Superiór Siénsia no Kultura, sei propoin ba asembleia kona-ba estebelesimentu akademia arte indústria kriativu kulturál, estabelesimentu biblioteka, estabelesimentu sentru kulturál, uma-lulik ho nomeasaun tais TL hanesan patrimóniu mundiál. Ida ne’e, kumpri ba ita-nia konvensaun tolu ne’ebé maka ita ratifika ho UNESCO,” dehan Sekretáriu Estadu Arte no Kultura, Teófilo Caldas, ba jornalista sira hafoin hala’o enkontru ho Primeiru-Ministru iha Palásiu Governu, Dili, tersa (14/5/2019).

Tuir planu, nia haktuir, sei informa ba nasaun CPLP sira katak Timor-Leste nia potensialidade kultura la’ós maka uma-lulik ho tais de’it maibé dansa, múzika, dialetu no fatin turizmu kulturál. Tanba, nia dehan, potensialidade kulturál ne’e hetan apresiasaun maka’as hosi membru governu CPLP sira.

Aleinde ida ne’e, nia esplika, iha debate entre membru governu nasaun CPLP sira, atu kria merkadu komun ho signifika ba sirkulasaun artista sira livremente atu halo movimentu entre  nasaun CPLP. Maibé, nia haktuir, Timor-Leste sujere maka oinsá atu kria mekanizmu no ko’alia mós kona-ba vistu, maske ne’e ministériu justisa nia kompeténsia.

Entretantu, kona-ba nomeasaun tais Timor-Leste atu sai patrimóniu mundiál, goveranante ne’e haklaken, tenke tuir kritériu sira ne’ebé maka UNESCO fó mak tais ne’ebé atu lakon mohu tanba nia autór mate hotu ona. Kritériu seluk tan mak tais ne’ebé maka ita hadau malu hela ho nasaun viziñu Indonézia hanesan Atambua, Kúpaun, Soe no Betun, tanba tais balun hosi Suai, Bobonaro ho Oé-Cusse ne’e ninia motivu kuaze atu hanesan ho sira na’in.

“Ita maka tenke aselera. Lalais uituan para ita maka sai na’in ba tais ne’e. Tanba tuir istória mós, Timor-Leste maka na’in ba tais ne’e,” Teófilo tenik.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here