Dadus kona-ba orsamentu ba programa merenda eskolár iha Ensiñu Báziku Sentrál no Eskola Filiál iha Sidade Dili. Foto Agência TATOLI

DILI, 14 maiu 2019 (TATOLI)—Programa merenda eskolár ba eskola 4 oras ne’e paradu, tanba seidauk simu orientasaun hosi edukasaun munisípiu Dili kona-ba kontinuasaun hosi programa refere.

Eskola 4 ne’e  mak Ensiñu Báziku Sentrál Bidau Akadiruhún (EBC-sigla portugés), Eskola Báziku Filiál (EBF) Nú Laran, EBF Massau no EBF Metiaut. Hosi eskola 4 ninia sentru mak Ensiñu Báziku Sentrál Bidau Akadiru-Hún ne’e rasik.

Koordenadór Eskola Filiál Nú-Laran, Suku Grecenfor, Postu Administrativu Na’in Feto, Rogério Pinto, hateten programa merenda eskolár iha rerefe iha tinan 2019 ladún la’o ho di’ak.

“Merenda eskolár iha tinan 2019 foin mai ami hala’o iha fulan-marsu nia laran, maizumenus merenda ne’e ami hala’o loron 19 de’it, hafoin ne’e ami seidauk simu orientasaun atu hatutan merenda ida ne’e,” Koordenadór Eskola Filiál Nú-Laran, Rogério Pinto, ba Agência TATOLI, iha nia kna’ar-fatin, Aldeia Formoza, Suku Grecenfor, Postu Administrativu Na’in Feto, tersa (14/5/2019).

Nia dehan, nia parte hanesan implementadór ba programa refere, tanba ne’e hein de’it orientasaun hosi governu.

Rogério hatutan, programa ne’e iha tinan 2018 ba kotuk la’o normál hahú hosi segunda to’o sesta, maibé tama iha tinan 2019 la’o ladún di’ak.

Koordenadór Eskola Filiál ne’e haktuir, programa refere iha tinan 2019 konsege implementa hahú hosi 20 marsu to’o 30 abríl, maibé hahú hosi maiu to’o oras ne’e paradu.

Koordenadór ne’e esplika, menu ne’ebé uza iha programa merenda eskolár ne’e hanesan modo-tahan, etu, fehuk-roupa, koto no foremungu.

Nia hatutan, merenda eskolár ne’e funsiona tuir númeru alunu. Kada alunu haan 0.25 sentavu. Totál alunu iha eskola filiál Nú-Laran hamutuk 597, iha sala aprendizajen 18 no profesór hamutuk 19 inklui koordenadór eskola. Profesór hirak ne’e permanente.

Nia esklarese katak alunu hamutuk 1230 mak asesu ona ba programa merenda eskolár, maibé oras ne’e númeru alunu aumenta ba 1444 iha tinan 2019.

Rogério esplika, Ensiñu Báziku Sentrál Akadiru-Hún, Eskola Báziku Filiál (EBF) Massau, Metiaut no Ensiñu Báziku Filiál Nú-Laran ne’e ninia sentru mak Ensiñu Báziku Bidau Akadiruhún.

Entretantu, Xefe Gabinete Ensiñu Báziku Sentrál (EBC-sigla portugés), Cesaltino Francisco Assis, hateten bainhira orsamentu ne’e tama iha eskola nia konta bankária, entaun hanesan implementadór tenke ezekuta.

“Kuandu tama ona ami implementa tuir orientasaun ne’ebé edukasaun munisípiu fó mai. Normálmente, la’o bazeia ba kalendáriu. Dalaruma mós la bazeia ba kalendáriu,” nia tenik.

“Iha tinan 2019 janeiru, ami implementa ba loron-haat, depois iha fulan-marsu ne’e sira aloka orsamentu ne’e ho loron 20, entaun implementa mai to’o iha 30 abríl. Loron 20 ne’e ami implementa la hotu no orsamentu ida ne’e ba primeiru transferénsia nian. Tanba ne’e, hakarak ka lakohi, ami tenke reimbolsa ba iha banku sentrál,” katak nia.

Maibé to’o oras ne’e dirijente hosi eskola refere seidauk simu informasaun hosi edukasaun munisípiu kona-ba kontinuasaun hosi programa merenda eskolár ne’e.

Rogério haklaken, orsamentu ne’ebé alokadu bazeia ba númeru alunu kada filiál nian no tuir Cost-Per-View (CPV) iha kada trimestrál.

“La bazeia númeru atuál estudante nian. Ezemplu, númeru ezistente ne’e bele liu, maibé orsamentu ne’e bazeia ba CPV ne’ebé Ministériu Edukasaun estabelese,” tenik Xefe Gabinete EBC Bidau Akadiruhún ne’e.

Nia hatutan katak, programa ne’e la’o bazeia ba transferénsia orsamentu. “Ami hatama tiha relatóriu ami hein de’it informasaun hosi edukasaun munisípiu, katak sira fó avizu osan iha ona, ami ba iha munisípiu. Sira fó CPV, ami foti osan, depois mak ami implementa. Kuandu sira la fó avizu, entaun osan seidauk iha,” nia haktuir.

Nia esplika, menu bazeia ba manuál hosi Ministériu Edukasaun ne’ebé servisu hamutuk ho Ministériu Saúde. Tuir nia, CPV ne’ebé perkore eskola haat ne’e hamutuk 2557.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here