Embaixadór Nova Zelándia, Philip Hewit, bainhira entrega karta kredensiál ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. Tersa, (14/5/2019). Imajen/ Mídia PR

DILI, 14 maiu 2019 (TATOLI)-Governu Nova Zelándia kontinua hatudu nia prontidaun no kometimentu  atu apoia Timor-Leste iha area tékniku no orsamentu.

Liuhosi enkontru entre Embaixadór Nova Zelándia, Philip Hewit ho Primeiru-Ministru, Taur Matan Ruak, iha Palásiu Governu, ohin, reprezentante Estadu Nova Zelándia nian aprezenta sira apoiu prioridade ba Timor-Leste, liuliu iha area edukasaun, turizmu, agrikultura no peska.

Embaixadór Philip Hewit informa katak, rezultadu enkontru ho xefe Governu  Timor-Leste, atu haree ba dezenvolvimentu setór privadu, edukasaun, turizmu, agrikultura no peska.

“Ami nia kooperasaun ne’e foku liu ba iha apoiu tékniku no orsamentu”, hatete Embaixadór Philip Hewit ba jornalista hafoin enkontru ho Primeiru-Ministru Taur Matan Ruak.

Daudaun ne’e, Governu Nova Zelándia apoiu hela  Ministériu Edukasaun, liuliu iha dezenvolvimentu pre-eskolár, dezenvolve setór turizmu, peska no iha agrikultura. Maibé tanba Embaixadór Philip Hewit foin halo misaun diplomata foun iha Timor-Leste, seidauk bele informa detalladu kona-ba montante orsamentu ne’ebé sei apoia Timor-Leste iha futuru.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here