Xefe Departamentu Jestaun Merkadoria Guarda Munisípiu Dili, Berta Santa Gonçalves Vieira. Imajen/Egas Cristovão

DILI, 14 maiu 2019 (TATOLI)-Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, informa, Munisípiu Dili sei koopera ho Polísia Nasionál Timor-Leste (PNTL) Munisípiu Dili, liuliu parte tránzitu no Diresaun Nasionál Transporte Terrestre (DNTT) hodi toma atensaun ba vendedór veíkulu iha dalan públiku sira.

“Ita mós sei ko’alia ho SERVE liuliu fó lisensa ba ema sira, mas tenke hatene fatin iha ne’ebé bainhira fó lisensa ba vendedór sira tenke haree uluk lai nia fatin bele fa’an duni ne’ebá ka lae?”, Berta Santa Gonçalve haktuir, ohin, iha edifísiu Munisípiu Dili, Matadouru.

Berta Santa Gonçalves Vieira hateten, bainhira fó lisensa maibé fatin lahatene maka ikus sai hanesan ne’e (ema fa’an arbiru) hodi halo administrasaun Munisípiu Dili mak ulun-fatuk moras.

“Mas ita buka koopera nafatin ho liña ministeriál sira para haree oinsá iha futuru ema labele fa’an. Tanba daudaun ne’e ita komesa hadi’a ona, maibé tenke neineik no beibeik para haree. Situasaun ita Timór ne’e, ohin, ita muda lato’o minutu ita liu, tau nafatin. Ida ne’e maka ulun moras”.

Maski esplika dekretu lei 33/2008 kona-ba ijiene no orden públika no mós halo sosializasaun, mas situasaun mak hanesan ne’e no sei haree kestaun refere.

Berta salienta, fa’an ne’e livre, maibé tenke hatene fa’an iha ne’ebé, katak, labele dehan livre ona no tau sasán iha estada públiku sira no vendedór ambulante sira ne’e livre dudu sasán bá ne’ebé, mas labele halo atividade permanente iha fatin ida. Enkuantu iha vendedór barak mak komesa komprende ona no ida ka rua mak seidauk no problema ne’e hahú menus ona.

Hatán sobre karreta no motór sira fa’an iha Lesidere nian ne’e xefe departamentu ne’e dehan, labele. “Labele tau karreta sira iha fatin sira dehan for sale, se hakarak fa’an iha uma, se sente ba dehan karreta mak barak tenke buka loja ruma tau karreta iha ne’ebá para selu taxa ba Estadu. Ita mós ko’alia tiha ona ho DNTT atu haree buat sira ne’e, so ké Munisípiu Dili seidauk iha materiál ruma, se ita mak iha tun bá foti sai tau iha Munisípiu Dili mak ó mai selu, mas ita seidauk, ita presiza hanorin malu lai”, Berta afirma tan.

Jornalista   : Maria Auxiliadora  

Editór         : Francisco Simões

HAKEREK NO HATÁN

Please enter your comment!
Please enter your name here