Negosiante roupa "obralan" komesa okupa Estrada ninin diresaun Ponte Komoro III, Dili. Dokumentasaun Tatoli/Egas Cristovão

DILI, 14 maiu 2019 (TATOLI)-Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, hatete munisípiu Dili fahe ona notifikasaun dahuluk no daruak ba vendedór obralan sira iha área besik Ponte Comoro III ka Hinode-Bashi (Lorosa’e), no bainhira iha notifikasaun datoluk mak fa’an nafatin ekipa sei halo atuasaun.

Xefe Departamento Jestaun Mercado Guarda Municipio Dili, Berta Santa Goncalves Vieira. Imajen/Egas Cristovão

“Lasala iha fulan oin, ita sei hala’o ida ne’e”, afirma  Berta Santa Gonçalves Viera, ohin, iha edifísiu Munisípiu Dili iha Matadouru.

Berta hateten, iha Ponte Lorosa’e ne’e kategoria ba estrada protokolu no loloos labele fa’an iha área ne’e.

“Uma sira iha okos mós (ponte okos) neineik sei sobu hotu tanba iha dadus ona, ne’ebé administrasaun munisípiu Dili agora fahe tiha ona notifikasaun para haree took fulan ida, rua mai ita sei halo, tantu obralan sira iha rotunda Nicolau Lobato tama mai mós ita sei hasai hotu”.

Loroloron ekipa jestaun merkadu halo patrullamentu ba vendedór sira ne’ebé fa’an sasán sira iha dalan ninin liuliu estrada públiku sira. Sobre obralaniha área Ponte Hinode nian okos ne’e Munisípiu Dili konsege sobu lubuk ida ona no iha ponte leten ne’e halo tiha ona avizu.

“Ha’u fó orientasaun ba xefe suku tenke tun no haruka sobu, maibé ita sei fó avizu tan depois ekipa sei sobu iha tempu badak nia laran”, afirma Berta Santa Gonçalves Viera.

Atu bele implementa lei ne’ebé iha no abitante sira bele halo tuir sirkulár ne’ebé fó sai ona, Berta hatutan, daudaun ne’e sei ezekuta dekretu lei 33/2008 kona-ba ijiene no orden públika, no seidauk bele fó sansaun, maibé sei sosializa dekretu lei ne’ebé bandu ema labele halo atividade iha estrada públiku sira, iha trotoar leten no fatin proibidu sira.

Jestaun merkadu haree ba kualkér vendedór no animál sira ne’ebé husik arbiru no sulan iha fatin ne’ebé la adekuadu no mós karreta sira ne’ebé fa’an iha estrada protokolu sira.

Adjuntu Autoridade Munisipio Dili, Jeca Filipe Smith. Imajen/Egas Cristovão

Sekretáriu Autoridade Munisípiu Dili, José Filipe Smith, hateten, ekipa tun ona hodi haree para hasai ema sira ne’ebé fa’an ne’e.

“Ita-nia ema sira ulun-fatuk toos loos. Ita-nia preokupasaun mak fó ameasa ba dezastre naturál, fó ameasa ba tráfiku tanba sira fa’an sasán iha espasu públiku”.

Iha lei 33/2008 bandu ona katak ema labele halo atividade ekonómika iha espasu públiku sira, populasaun hatene ona sira kontra hela lei, mas kontinua halo maibé munisípiu Dili kontinua halo aproximasaun para sira tenke kumpre preokupasaun ne’ebé munisípiu Dili preokupa.

Daudaun ne’e vendedór obralan sira halo ona uma ki’ikoan sira hodi fa’an, no Munisípiu Dili hatene ida ne’e no haruka ekipa tun, maibé fila-liman sira ne’e ho razaun katak fatin laiha.

“Mas hatete ba sira la’ós razaun fatin laiha, ne’ebé Munisípiu Dili kontinua halo aproximasaun para sira bele sai hosi ne’ebá. Lei 33 iha mas ita laiha kbiit atu fó sansaun ne’e mak problema. Neineik ami sei hasai sira, sira halo buat hotu konforme sira-nia hakarak, mas labele. Ita haree kondisaun ruma depois sei hasai, tenke iha ekipa konjuntu através polísia, seguransa sivíl, forsa para hasai sira depois labele dehan fali ditadura”, hateten José Filipe Smith.

Lee mós dekretu lei 33/2008 : http://www.mj.gov.tl/jornal/?q=node/1341

Jornalista   : Maria Auxiliadora

Editór           : Francisco Simões

2 KOMENTÁRIU

  1. Iha ona Fatin preparadu no sufisiénte bá vendedor sira mak ita uja poder liu husi dalan legal atu hasai sira?
    1.Prepara uluk tiha fatin sufisiénte bá sira,depois haruka sira bá
    2.Lalika halo lei maibé laiha kondisaun no uja lei ne’e hodi hanehan nafatin povu sira

    Lo’os duni katak Autoridade hato’o beibeik ona bá sira atu husik fatin públiku:

    Sorin seluk

    Ekonomia mak obriga sira tenke fan iha públiku tanbá fatin laiha.Sira halai bá Manleuana no Taibesi iha fatin ga lae,sira konsentra hotu iha ne’ebá?Dala-ruma negosiante lubuk ida bá iha ne’ebá Seguransa merkadu mak duni sai fali
    razaun tanbá Fatin laiha ona.

HAKEREK NO HATÁN

Please enter your comment!
Please enter your name here