Plenaria Parlamentu Nasionál (PN). Imajen/ António Gonçalves

DILI, 14 maiu 2019 (TATOLI) –Lei Anti Korrupsaun ne’ebé Komisaun A Parlamentu Nasionál, halo ona konsultasaun públiku, kontempla  mós artigu balun atu sita material korruptu.

Vise Prezidente Komisaun A ne’ebé trata asuntu Konstituisaun no Justisa, Francisco de Vasconcelos.

Vise Prezidente Komisaun A ne’ebé trata asuntu Konstituisaun no Justisa, Francisco de Vasconcelos, Segunda (13/5/2019), iha uma fukun PN, esplika, komisaun halo ona diskusaun públiku ho entidade relevante sira ba Lei Anti Korrupsaun (LAK) nian no iha lei ne’e rasik sei aplika atu sita materiál korruptu, tanba durante ne’e ema halo korrupsaun depois prosesa no ba kastigu maibé Estadu la sita korruptór sira nia sasán ne’ebé nia halo iha ámbitu tarefa.

“Durante ne’e sira ne’ebé komete korrupsaun ba kastigu de’it ,maibé sira nia sasán Estadu la sita. Agora, iha Lei Anti Korrupsaun ne’e hateten tenke sita sasán ne’ebé nia hetan liuhosi dalan ilísitu”,  esplika Vise Prezidente Komisaun A Francisco de Vasconcelos, ne’ebé haktuir rekomendasaun sosiedade sivíl nian iha ámbitu diskusaun LAK ne’ebé hala’o iha loron hirak liu ba.

Nia akresenta, korrupsaun ne’e klaru katak tenke sita nia materiál hotu. Durante ne’e Estadu seidauk aplika tanba seidauk iha lei espesífiku, tanba ne’e, maka LAK agora ne’e todan katak se maka halo aktu korrupsaun tenke hanoin dala rua ka tolu.

Nia hatutan, aktu korrupsaun ne’e la’ós ba desizaun Estadu nian, maibé setór privadu sira no sidadaun baibain sira mós aplika hotu tanba balun bele manipula folin sasán, ida ne’e mós korrupsaun ida.

“Lei ne’e la’ós haree ba servidór Estadu de’it, hanesan funsionáriu públiku, membru governu, deputadu sira, maibé ba  setór privadu no sidadaun hotu prevalese”, informa Francisco de Vasconcelos.

Nia hatutan tan, uluk Estadu seidauk iha lei kona-ba fraude konstrusaun, maibé agora iha LAK aplika ona, tanba ne’e maka ema ruma manan projetu tenke halo ho kualidade. Se la’e, supervizaun sira mós kona hotu. Sansaun saida maka atu aplika ba hirak ne’ebé komete aktu hanesan ne’e, iha lei hahú prevee ona.

“Maske durante ne’e ita iha kódigu penál, kódigu prosesu penál no kódigu sivíl, maibé ita iha hanoin atu prodús duni LAK nu’udar kompromisu eleitorál, nune’e Komisaun Anti Korrupsaun bele hala’o funsaun di’ak liután hodi kombate korrupsaun”, tenik Francisco de Vasconcelos.

Nia husu ba públiku atu hein ba produsaun LAK tanba parlamentu iha vontade atu avansa LAK nu’udar kompromisu eleitorál, enkuantu diskusaun ba LAK ne’e sei kontinua nafatin, maske segunda ho tersa iha plenária, maibé kuarta to’o sesta Komisaun sei halo nafatin diskusaun ba lei refere ho entidade relevante sira. Tanba parlamentu hakarak prodús lei ho kualidade tuir espetativa hodi kombate korrupsaun.

Komisaun A halo ona diskusaun ho parte hotu no atinje ona artigu 12 no sei barak liután atu presiza diskute, entretantu iha LAK ne’e hamutuk artigu 140 resin, signifika loron ida bele diskute artigu rua ka tolu.

 Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here