Sekretáriu Estadu Arte no Kultura, Teófilo Caldas. Imajen/António Gonçalves

DILI, 14 maiu 2019 (TATOLI)—VIII Governu Konstitusionál liuhusi Sekretaria Estadu Arte no Kultura (SEAK), halo hela perparasaun ba serimónia rituál haloot kro’at ne’ebé sei realiza iha loron 18 maiu 2019.

“Ohin, mai enkontru ho primeiru-ministru atu informa serbisu Sekretaria Estadu Arte no Kultura nian, liu-liu perparasaun ba serimónia rituál haloot kro’at ne’ebé sei realiza iha 18 maiu 2019 tuku haat lorokraik,” informa Sekretáriu Estadu Arte no Kultura, Teófilo Caldas, ba jornalista sira hafoin hala’o enkontru ho Primeiru-Ministru, Taur Matan Ruak, iha Palásiu Governu, Dili, tersa (14/5/2019).

Governante ne’e hatutan, serimónia rituál ne’e kontinuasaun hosi serimónia rituál ne’ebé mak realiza ona iha tinan 2006. Iha 2006, governu organiza serimónia rituál ne’e rua. Ida maka serimónia haloot kro’at tanba funu ramata ona. Serimónia ida seluk, nia dehan, lia-na’in sira hosi munisípiu 13 hamutuk hodi hamulak ba Maromak, matebian-sira no husu ba natureza loke dalan ba prosesu fronteira marítima atu Timor-Leste bele atinje ninia objetivu.

“Hafoin iha tempu ne’ebá, lia-na’in sira mós husu ba Maromak, ba matebian-sira, ba natureza, uma-lulik sira atu fó dalan oinsá maka ita bele luta ba dada kadoras mai Timor-Leste. Ikus mai, ita atinje ka alkansa objetivu refere, liuhusi esforsu eis Primeiru-Ministru, Xanana Gusmão ho VIII Governu Konstitusionál nia naran,” nia dehan.

Nia haktuir, agora halo kontinuasan ba serimónia rituál ne’e tanba iha 2006 lia-na’in sira halo tiha serimónia rituál, sasán kulturál sira ne’e ba tau iha Ai-To’os Jardim Borja da Costa Motael nian maibé hetan estragu hosi natureza tanba ai monu hanehan. Lia-na’in sira ne’e, mai informa ba Xefe Governu atu kontinua halo fali serimónia rituál hodi muda fali “Ai-To’os” ne’e ba fatin seluk.

“Primeiru-Ministru kanaliza sira ba hasoru SEAK, mai haree kedas fatin ne’e. Ita desidi hamutuk ho lia-na’in sira, muda fali “Ai-To’os” ne’e hosi Jardim Borja da Costa ba fali iha rezidénsia ofisiál Prezidente Parlamentu nia oin ne’e ho forma lutu hale’u. Ida ne’e, hanesan símbolu ida. Iha parte relijiozu nian maka igreja. Parte ita-nia tradisaun ka kultura Timor nian maka lia-na’in sira halo ‘Ai-To’os’ ne’e,” Caldas esplika.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here