Ministra Finansa ein ezersísiu, Sara Lobo Brites (Loos) akompañadu husi Embaixadora Estadus Unidus Amerika Kathleen M. Fitzpatrick (Klaran), Diretóra Misaun Usaid iha Timor-Leste Diana B. Putman (Karuk) halo Konferensia Imprensa,Imajen/Egas Cristovão

DILI, 14 maiu 2019 (TATOLI)-Estadu Unidu Amérika (EUA) ne’ebé reprezenta hosi Ajénsia Estadu Unida ba Dezenvolvimentu Internasionál (USAID), ohin,  asina ona revizaun ba Akordu Objetivu Dezenvolvimentu (DOAG-sigla inglés) ho Governu Timor-Leste ne’ebé aumenta millaun US$16.85 hosi EUA.

Embaixadóra Estadus Unidus Amerika, Kathleen M. Fitzpatrick. Imajen/Egas Cristovão

Akordu ne’e asina diretamente hosi atuál Vise-Ministra Finansa no Ministra Finansa en funsaun, Sara Lobo Brites ho Diretora USAID, Diana B. Putman, iha Edifísiu Ministériu Finansa, Ai-tarak Laran, Dili.

Asinatura ba revizaun ne’e nu’udar ba daneen nian iha DOAG dezde asina iha inísiu 2014 no akordu ne’e extende to’o 30 setembru 2020. Revizaun ne’e presiza bainhira EUA fornese fundu adisionál ba akordu orijinál. Ho ida ne’e, kontribuisaun EUA ba akordu 2014 liuhosi USAID hamutuk millaun US$70.88.

Ministra Finansa en funsaun, Sara Lobo Brites, hateten, tinan-tinan USAID fó apoia ba Timor-Leste, maibé halo emenda ba dala-neen no hosi ne’e hetan fundu adisionál, ho nune’e USAID nia apoia liuhosi programa DOAG (Development Objective Agreement) ne’ebé hasa’e millaun US$70.88.

“Apoiu ne’e iha área lubuk ida iha agrikultura, turizmu, kapitál sosiál, no mós Alfándega, pur tantu ita espera hosi apoiu ne’e bele fó benefísiu mai ita-nia dezenvolvimentu liuliu iha área sira ne’ebé sai hanesan prioridade ba Governu atu dezenvolve”, Ministra Sara Lobo Brites hato’o iha konferénsia imprensa hafoin serimónia asinatura ba revizaun daneen hosi akordu DOAG entre Timor-Leste no USAID iha Ministériu Finansa.

Embaixadóra EUA, Kathleen M. Fizpatrick, hatete ho akordu DOAG ne’e reprezenta relasaun forte no kompromisu ho Timor-Leste, no sei kontinua USAID nia programa sira iha agrikultura, turizmu, demokrasia no governasaun di’ak, Aduaneira, bee no saneamentu no saúde.

Aléinde USAID reprezenta parte hotu iha esforsu EUA iha Timor-Leste, embaixada EUA apoia Timor-Leste hodi atinje nian objetivu sira liuhosi programa no atividade oioin, ezemplu iha asaun defeza kolabora ho Ministériu Defeza Timor-Leste hodi dezenvolve kapasidade no estabelese ezersísiu multilaterál sira.

“Ho fundu ne’e, Estadu Unidu mantén ninia kompromisu ba haforsa parseria ho Timor-Leste tuir servisu ne’ebé iha ba atinje ninia meta rasik”, hateten Membaixadóra Kathleen M. Fizpatrick.

Diretora USAID, Diana B. Putman, hato’o nia orgullu hodi subliña katak, USAID servisu ona antes Timor-Leste hetan independénsia no sei iha ne’e ohin loron hodi ko’alia kona-ba kompromisu EUA nian ba Timor-Leste nia dezenvolvimentu.

EUA no USAID sente hanesan sorte ida sai nu’udar pilár importante ba nasaun ne’ebé sai husi konflitu ba iha nasaun demokrátiku ho dezenvolvimentu no livre iha entre sudeste aziátiku.

“Asina ohin marka kompromisu Estadu Unidu nian liuhusi USAID ne’ebé tau fundu besik millaun 17 ba dezenvolvimentu Timor-Leste nian hodi nune’e sei ajuda hadi’ak moris povu Timor-Leste nian liuhusi servisu agrikultura, turizmu, demokrasia no governasaun no saúde hodi marka área hotu iha ami-nia asisténsia”, hateten Diana B. Putman.

Bainhira Povu Timor-Leste moris di’ak ona, nasaun ne’e bele hamriik rasik ho forsa demokrátika ne’ebé iha hodi bele rezolve nia dezafiu sira iha dezenvolvimentu.

Hosi fundu ne’ebé aumenta ona ba iha revizaun ida ne’e sei gasta ba atividade neen hanesan avansa agrikultura. Projetu ba tinan lima (2015-2020), implementa iha Munisípiu Ainarp, Aileu, Liquiçá, Ermera Bobonaro no Dili. Objetivu projetu nian hodi hadi’a no haboot kadeia valór ortikultura nian liuhusi asisténsia téknika no dezenvolve ligasaun ba merkadu ba ai-fuan no modo.

Projetu turizmu ba ema hotu ho durasaun tinan lima (2018-2023). Implementa iha área foho Ramelau, Illa Ataúru, no Dili. Projetu foka ba promove Timor-Leste nia kompetividade nu’udar destinasaun turizmu internasionál enkuantu prezerva ambiente úniku no patrimóniu kulturál.

Fundu ne’e mós sei utiliza ba hasa’e reziliénsia komunidade iha Oe-Cusse hosi 2015-2020. Projetu ne’e ajuda komunidade iha rejiaun tomak hodi hadi’a sira-nia asesu ba bee-moos, jere bee-matan no hadi’a sira-nia seguransa finanseira liuhusi introdús konservasaun agrikultura, hakbiit grupu poupansa komunidade nian no fornese treinamentu ba komitiva jestaun bee nian.

No mós projetu hakbiit servisu báziku ba tinan lima (2015-2020), ne’ebé implementa iha Munisípiu Covalima. Projetu ne’e ajuda Ministériu Saúde hadi’a kapasidade iha nivel nasionál no munisípiu hodi fornese servisu saúde ne’ebé kualidade no ho impaktu ne’ebé boot. Munisípiu ne’e hanesan tarjetu hodi bele sai hanesan modelu ba prestasaun servisu saúde iha Timor-Leste laran tomak.

Atividade haforsa eleisaun inkluziva no prosesu polítiku. Projetu ne’e ba tinan tolu (2016-2019). Projetu ne’e servisu hamutuk ho Parlamentu Nasionál, caucus parliamentarian no partidu polítiku ho énfaze ba feto no juventude hodi kria governasaun ida ne’ebé inkluziva, transparente no bazeia ba lei no orden.

Ikus, mak ba projetu reforma Aduaneira ba tinan tolu (2017-2019). Projetu ajuda Governu Timor-Leste redús kustu komersiál nian liuhusi prátika di’ak internasionál ba despaxu Aduaneira nian no prosedimentu tránzitu. Projetu ne’e haforsa instituisaun no kapasidade umana Autoridade Aduaneira foun nian, nune’e bele banati tuir padraun prátika di’ak globál no rejionál kona-ba komérsiu no hasa’e rendimentu doméstiku.

Jornalista   : Maria Auxiliadora

Editór         : Francisco Simões

 

HAKEREK NO HATÁN

Please enter your comment!
Please enter your name here