Primeiru Ministru Taur Matan ho Pedro Carrascalão Akompañadu husi Managing Directór of Alton Consultancy, Adam Cowburn iha Palásiu do Governu,Imajen/Egas Cristovão

DILI, 13 maiu 2019 (TATOLI)-Espesialista timoroan iha área aviasaun, Pedro Carrascalão lori Diretór Jerál Alton Aviation Consultancy, Adam Cowburn husi Estadu Unidu Amérika (EUA), hasoru malu ho Primeiru-Ministru (PM), Taur Matan Ruak hodi ko’alia kona-ba kestaun aviasaun iha Timor-Leste.

Hafoin enkontru ho xefe governu, espesialista timoroan ne’e haktuir katak nia sujere ba governu hodi bele harii kompañia nasionál aérea rasik hodi bele fó solusaun ba problema folin billete aviaun nian.

Pedro Carrascalão, Imajen/Egas Cristovão

“Ohin ha’u fó hanoin ba Primeiru-Ministru katak tempu ona atu ita harii kompañia nasionál (flag carrier) tanba ita labele depende de’it husi kompañia rai li’ur, tanba sira mai ne’e sira la haree folin ne’ebé diak mai ita, kastigu no izola tan ita,” informa Espesialista Pedro Carrascalão ba jornalista sira iha Palásiu Governu, segunda (13/05).

Tuir Pedro, situasaun aviasaun iha Timor-Leste agora dadauk iha problema boot no fó impaktu ba ekonomia rai laran, mezmu governu tenta buka solusaun maibé to’o agora folin billete kontinua karun, tanba ne’e nu’udar timoroan ne’ebé esperiénsia iha área aviasaun obriga nia hodi tulun governu bele buka solusaun.

“Iha mekanizmu barak husi parte téknika, parte polítika no intrese parte governu nian atu rezolve,” reforsa tan espesialista ne’e.

Primeiru Ministru Taur Matan Ruak Hasoru Malu Pedro Carrascalão, Imajen/Egas Cristovão

Nia mós lori espesialista aviasaun husi Amérika ne’ebé tulun ona governu no kompañia barak. Tuir nia, PM hatudu interesse no hanoin katak tempu duni atu harii konpañia aérea nasionál, mezmu Xefe Governu dehan governu presiza tempu hodi bele estuda no bainhira harii mós tenke tuir dalan klaru no tuir interese nasionál.

“Ami-nia prezensa atu hatudu dalan, oinsá mak ida ne’e bele akontesse liuhosi planu, estratejia, finansiamentu, sustentabilidade, para harii duni karik tenke tuir planu ne’ebé ami halo no estudu ne’ebé mak di’ak,” nia akresenta.

Prontu Harii Task Force

Iha biban ne’e, Pedro Carrascalão mós hato’o ba Primeiru-Ministru katak nia parte prontu harii Task Force ne’ebé kompostu husi timoroan ne’ebé matenek ba área aviasaun hamutuk ho espesialista husi Amérika.

Tuir nia, funsaun harii Task Force tanba iha Timor-Leste iha timoroan barak ne’ebé matenek iha área aviasaun maibé ita la-hatene  no la-uza sira. “Dalaruma ema husi li’ur, mai ho sira-nia hanoin maibé sira iha interese komersiál no haree ba sira-nia benifísiu hanesan kompañia husi rai li’ur. Laiha grupu ida husi Timór ne’ebé mai hasoru governu hodi hatudu katak sira iha esperiénsia iha área aviasaun no haree husi parte interese nasionál”.

Ho hanoin hirak ne’e mak espesialista timoroan ne’e hakarak harii Task Force hodi involve espesialista sira ne’ebé nia interesse halai liu ba intrese nasionál no independente ba saida mak governu hakarak, la’ós saida mak kompañia hakarak.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here