Embaixadór Nova Zelándia, Philip Hewit, bainhira entrega karta kredensiál ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. Tersa, (14/5/2019). Imajen/ Mídia PR

DILI, 14 maiu 2019 (TATOLI) – Embaixadór Nova Zelándia, Philip Hewet, konvida Prezidente Repúblika (PR), Francisco Guterres Lú Olo, vizita Nova Zelándia.

Pedidu ne’e Philip Hewet hato’o bainhira entrega karta kredensiál ba Xefe Estadu iha Palásiu Prezidensiál, Bairru Pité, ohin.

“Embaixadór foun hato’o mós konvite husi Xefe Estadu Nova Zelándia nian ba Prezidente Repúblika hodi marka tempu ida hodi hala’o vizita ba Nova Zelándia”, haktuir Diretór Jéral Asuntu Bilaterál Ministériu Negosiu Estranjeiru no Kooperasaun (MNEK), Isíliu Coelho, ba jornalista sira hafoin asiste serimonia entrega karta kredensiál.

“Prezidente republika responde katak sei haree ajenda, tanba iha komvite barak no mós iha Estadu parseiru prioritaria barak”.

Isílio Coelho hatutan vizita ne’ebé Xefe Estadu sei hala’o ba Nova Zelándia hanesan vizita polítika.

Timor-Leste iha tinan 2015 apoiu kandidatura Nova Zelándia ba membru la permanente ba Konsellu Seguransa ba Nasaun Naklibur sira (ONU).

Desde estabelesimentu kooperasaun bilaterál entre nasaun rua, Nova Zelándia fó apoiu ba dezenvolvimentu iha Timór-Leste iha area infraestrutura, kapitál sosiál, ekonomia, justisa no seguransa.

Nova Zelándia oras ne’e esplora apoiu iha área dezenvolvimentu polítika turizmu Timor-Leste ba nivel internasionál.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here