Imajen inundasaun iha Natarbora, Manatuto, domingu (12/5/2019). Foto espesiál

DILI, 13 maiu (TATOLI)—Ekipa Diresaun Nasionál Protesaun Sivíl (DNRS), rejista katak asidente dezastre naturál ne’ebé akontese iha parte leste (Baucau, Lospalos) no kosta súl (Viqueque, Manufahi) hosi loron tersa (07/05) to’o segunda (13/05), rezulta ona ema na’in tolu mate.

Vítima sira na’in tolu ne’ebé mate ida hosi Munisípiu Lautém impaktu hosi bee tama uma, ida hosi Postu Administrativa Uatulari, Munisípiu Viqueque ho kondisaun difisiente mate tanba ai boot tohar hanehan uma iha loron sesta (11/05), no ida Munisípiu Manufahi  nian mós mate iha loron domingu (12/05) tanba mota boot maka lori.

Sekretáriu Estadu Protesaun Sivíl, Alexandrinho Xavier Araújo informa, agora dadaun ekipa DNRS no Ministériu Solidaridade Sosiál no Inkluzaun (MSSI) inklui Cruz Vermelha de Timor-Leste (CVTL) lori ona apoiu materiál hanesan kaixaun hodi fó ajuda ba família vítima.

“Ita rejista ema na’in tolu maka mate. Ida hosi Uatulari-Viqueque mate horisehik (12/05), nu’udar difisiente ida ai mak hanehan. Ida iha Lospalos mate iha loron kuarta (80/05) tanba bee tama uma. Ida seluk iha Same (Manufahi) mate horisehik tanba mota mak lori,” dehan Alexandrinho ba jornalista sira iha edifísiu Protesaun Sivíl, Caicoli, Dili, ohin.

Nia salienta katak kona-ba totál númeru vítima Munisípiu Baucau, Lautém, Viqueque, Manufahi no Covalima, ekipa DNRS no MSSI seidauk iha númeru serteja, tanba ekipa sei iha hela prosesu rekolla dadus.

Oras ne’e, Alexandrinho hatutan, DNRS, CVTL, Bombeiru inklui MSSI no ajénsia internsionál no Sentru Lojístika Nasionál (SLN) prepara ona foos saka 5000 atu fahe ba vítima sira.

“Ha’u seidauk bele fó dadus totál. Ita sei iha faze rekollamentu dadus. Parese kada munisípiu balun indentifika iha vítima 15, balun lima (5) no hosi parte Same nian mak evakuasaun kuaze família 15 tanba rai halai,” nia haktuir.

Anin no udan boot ne’e halo estrada inklui ponte kiik barak kotu no ekipa Ministériu Obra Publika mós tún ona iha terrenu hodi hadi’a tutuir estrada sira ne’ebé kotu hodi fasilita movimentu transporte públiku.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here