Manager Exploration Acreage Release(ANPM) Cristino da Cruz,Imajen/Egas Cristovão

DILI, 13 maiu 2019 (TATOLI) – Ekipa téknika husi Autoridade Nasionál Petróleu no Minerál (ANPM) no Institutu Petróleu no Jeolojia (IPG) halo aprezentasaun ba Primeiru-Ministru (PM), Taur Matan Ruak no Ministru Planeamentu no Investimentu Estratéjiku (MPIE) en ezersísiu, Hermenegildo Augusto Cabral Pereira, kona-ba projetu LiDAR (Light Detection and Ranging) hodi haree Potensiá Petróleu no Minerál ba interese nasionál.

Diretór liberasaun área esplorasaun husi ANPM, Cristino da Cruz haktuir, nia parte halo aprezentasaun kona-ba LiDAR II, ne’ebé nia serbisu hasai fotografia foku liu ba grafiti, magnétiku no gravity gradiometry (gradiometria gravidade).

“Primeiru-Ministru nia mensajen kona-ba dadus no kualidade dadus, liu-liu oinsá atu jere dadus hodi uza ba rai laran atu bele halo analiza hodi fó importánsia ba rai laran, liu-liu ba setór petróleu no minerál, ohin mós esplika liu kona-ba oinsá mak ita atu halo kontrolu kualidade ba dadus hodi hatene katak dadus sira ne’ebé mai ho kualidade padraun internasionál,” informa Diretór Cristiano da Cruz ba jornalista sira iha Palásiu Governu, segunda (13/05).

Tuir Cristiano, em termos tékniku, iha implementasaun levantamentu dadus ne’ebé sei presiza kontinuasaun. “Iha faze agora daudauk falta levantamentu dadus ida de’it mak falta. Tanba ne’e, ohin halo aprezentasaun para hatudu ba Primeiru-Ministru oinsá ba oin presiza extensaun,” friza diretór ne’e.

Nia mós dehan, projetu LiDAR II hansanen implementasaun husi LiDAR I, ne’ebé halo fotografia ba rai laran nian no haree detallu kona-ba dadus ne’ebé foti husi LiDAR I.

Diretór of Geo-Information System Osorio Xavier Costa, Imajen/Egas Cristovão

Iha fatin hanesan, Diretór sistema jeo-informasaun husi IPG, Osorio Xavier da Costa ne’ebé halo aprezentasaun ba LiDAR I reforsa, informasaun dadus sira tenke klasifika ne’ebé mak importante liu tanba ne’e sai segredu ba nasaun nian, nune’e mós diskusaun ne’e ko’alia kona-ba oinsá mak iha futuru bele jere dadus sira ho di’ak no organizadu.

“Agora ita tama iha polítika ida oinsá ita bele jere dadus ho sistemátiku no integradu hodi fó benifísiu ba planu dezenvolvimentu iha teritóriu tomak,” hateten diretór ne’e.

Nune’e enkontru koa’lia liu kona-ba futuru aplikasaun ba setór hotu-hotu hanesan agrikultura, saneamentu no seluk tan, no mós iha parte jeolojia nia.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here