DILI, 14 maiu 2019 (TATOLI) – Vise-Ministru Obras Públikas, Nicolau Lino Freitas Belo hasoru malu ho Primeiru-Ministru (PM), Taur Matan Ruak hodi relata serbisu ministériu no iha biban hanesan governante ne’e informa razaun ahi mate lakan iha domingu loron 12 maiu tanba impaktu husi manutensaun  sistema distribuisaun eletrisidade.

“Ahi mate lakan tanba impaktu husi manutensaun, ikus mai ita haree feeder II no VI husi parte Ministériu Obras Públikas (MOP), liu-liu Diresaun Nasionál Eletrisidade informa katak halo reabilitasaun ba liña eletrisidade liu-liu ba distribuisaun. Nune’e agora rezolvidu ona”, hateten Vise-ministru, Nicolau Lino Freitas Belo hodi hatán ba pergunta jornalista sira iha Palásiu Governu, tersa (14/05).

Lista linha media tensaun. Imajen espesial

Antes ne’e, Ministru Obras Públikas, Salvadór Eugénio Soares dos Reis hateten eletrisidade ne’ebé mate kalan ikus-ikus ne’e tanba falta manutensaun rotina, maske nune’e nia admite governu kontinua hadi’a sistema distribuisaun eletrisidade.

“Preokupasaun eletrisidade mate lakan, problema ne’e normalmente tinan-tinan tenke iha manutensaun. Manutensaun ida mak tenke hamoos ai sira. Iha tinan 2018, ita tenta halo no kontinua halo nafatin, alende melloramentu sistema liña distribuisaun, liuliu iha Dili,” tenik ministru.

Governante ne’e dehan tan, durante tinan rua nia laran laiha pagamentu tanba orsamentu laiha, maibé agora daudaun extende tan kontratu hodi kompañia sira komesa hala’o serbisu, nune’e bele kontinua instala ai-riin no fiu eletrisidade iha Dili laran, hodi troka infraestrutura ne’ebé tuan iha tempu Indonézia nian.

Ministru Obras Públikas Salvador Soares dos Reis Pires, Imajen/Egas Cristovão

Nia akresenta, falta manutensaun iha tempu barak halo transformadór rebenta, koneksaun ilegál no transformadór ne’ebé loloos nia kapasidade atu sustenta ligasaun ba uma kain lima de’it maibé tanba koneksaun ilegál kontadór pre-pagu laiha, iha tempu badak entaun nia load (karga) ne’e aumenta no halo transformadór keimadu.

Nune’e mós nia esplika, kauza eletrisidade mate lakan tanba problema isolator komponente eletrisidade, ai-monu no inundasaun, ne’ebé kuandu avaria ona lori tempu atu hadi’a, tanba agora daudaun laiha sistema automatizasaun. “Kuandu ahi mate iha liña ne’ebé mak naruk husi fornesimentu Becora to’o Comoro, ekipa tékniku EDTL (Eletricidade de Timor-Leste) la’o ho lampra hodi leno fizikamente, ida ne’e mak sistema ezistente”.

Maske nune’e, nia dehan governu nia esforsu mak mobiliza ekipa tékniku sira atu serbisu lalais.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here