Prezidente Autoridade Munisípiu Dili, Gaspar Soares

DILI, 14 maiu 2019 (TATOLI)—Administrasaun Munisípiu Dili, lideradu Gaspar Soares, sei prioritiza setór infraestrutura tolu importante hanesan bee-moos, harii uma ba kbiit laek no fó atensaun ba estrada rurál.

“Tinan ida ne’e ita sei fó prioridade nafatin ba infraestrutura munisípiu ninian. Primeiru, ita atu tau atensaun liu ba bee-moos. Segundu, tau atensaun uma ba família kbiit laek sira no  terseiru fó atensaun liu ba estrada rurál sira,” Prezidente Autoridade Munisípiu Dili ba Agência TATOLI iha Parlamentu Nasioná, tersa (14/5/2019).

Nia dehan, setór hirak ne’e importante, tanba nesesidade báziku ba komunidade. Nia hatutan, programa jerál Munisípiu Dili nian intermu kapitál dezenvolvimentu, balun tama iha grande projetu no balun tama iha PDIM (Planu Dezenvolvimentu Integradu Munisipál).

Tanba ne’e, Gaspar informa, parte Administrasaun Munisípiu Dili nian aprezenta planu no orsamentu kuaze  miliaun $20 ba tinan 2020, maibé la tama iha kapitál dezenvolvimentu. Hosi orsamentu miliaun $20 ne’e ba de’it bens servisu, saláriu vensimentu  nomoos transferénsia públika.

“Ita ko’alia kona-ba kapitál dezenvolvimentu signifika ba PDIM, hanesan bee-moos, ita ko’alia kona-ba estrada rurál sira, ita ko’alia uma ba kbiit laek sira no edifísiu servisu munisipál nian,” nia salienta.

Kona-ba preokupasaun ba bee-moos, Prezidente Autoridade Munisípiu ne’e esplika, problema la’ós iha jestaun bee-moos.

“Ita-nia problema iha kanalizasaun bee nian. Ha’u bele dehan katak kanalizasaun bee-moos ladún di’ak. Segundu, ita-nia komunidade ladún iha konsiénsia no estraga. Ha’u hanoin futuru tenke hadi’a,” Gaspar tenik.

Prezidente Autoridade Munisípiu Dili ne’e subliña katak kona-ba funsionamentu bee-moos iha Postu Administrativu Kristu Rei, Munisípiu Dili, ne’e tama iha bens no servisu.

 Jornalista: Evaristo Soares Martins

Editór: Xisto Freitas

1 KOMENTÁRIU

  1. hau hanoin AM Dili mos tenke plenea ona konaba Community Housing ho modele ida nebe aplika laos ba kbit laek sira deit maibe aplika ho modelu ida buka reseita ba estadu nee tamba Dili hanesan sentru agora dadauk komunidade barak mak aluga uma iha Dili laran, AM Dili tenek hare ona katak ida nee bele produs reseita Estado labele iha ona puder maibe la hao buat ida pior liu instrumentu sira nebe iha ona maibe la maksimiza hodi produs reseita ba Estado

HAKEREK NO HATÁN

Please enter your comment!
Please enter your name here