Imajen Proklamasaun RDTL 28 novembru 1975. Foto espesiál

DILI, 10 maiu 2019 (TATOLI)—Mate ka Moris, Ukun Rasik-Án. Moris ka Mate, Ukun-Án Rasik. Filozofia ida ne’e, fanu timoroan sira hadeer, hamriik luta hodi hadau ukun rasik-án. Mate ka moris, moris ka mate, iha Arquivo Museu da Resistênsia Timorense (AMRT), sei hamoris nafatin filozofia “Mate ka Moris, Ukun Rasik-Án” liuhusi istória no imajen sira ne’ebé taka hela iha lalehan “Resistir é Vencer!” nia didin-lolon sira be nonók no monok.

Imajen istóriku ba luta libertasaun nasionál. Foto espesiál

Sala Independénsia

“Agora, ita tama ba iha sala independésia,” dehan matadalan, Pedro Ribeiro da Costa, hodi hatudu ba imajen sira iha sala laran ne’e, AMRT, Dili, sesta (10/5/2019). “Ita hahú hosi parte ida ne’e.”

Nia haktuir, bainhira Salazar monu, iha Timor-Leste estabelese kedas partidu polítiku. Timoroan matenek sira harii partidu lima maka hanesan; partidu UDT harii primeiru, FRETILIN, APODETI, KOTA no Trabalhista. Timoroan sira ne’e mai ho hanoin no hakarak la hanesan. UDT hakarak ukun-án maibé husu ba governu Portugés halo governu tranzitóriu para Portugal sira perpara halo kondisaun (halo estrada, harii ospitál, edisfísiu sira) durante tinan lima, maka Timor-Leste ukun rasik-án.

Maibé FRETILIN lakohi tanba ne’e oportunidade osan-mean. Aban bainrua nia hanoin muda, ne’e buat hotu di’ak ona. Bele ka labele, ukun rasik-án. Mate ka moris, ukun rasik-án. APODETI kompara katak distánsia Portugal dook demais. Apodete sujere, besik liu maka maun-alin Indonézia no úniku solusan maka dalan ba integrasaun ho Indonézia. Partidu KOTA hakarak ukun rasik-án maibé adapta sistema monárkia—só ema liurai maka bele kaer ukun. Partidu Trabalhista fali, lahakarak ukun-rasik-án maibé hakarak liu maka halo federasaun ba Austrália.

Maibé, ikus mai, FRETILIN ho UDT halo koaligasaun ida, hodi asina Memorandum of Understanding (MoU) atu forna governu hodi governa, tenke liuhusi eleisaun tanba Timor-Leste nasaun demokrátika—maski ida ne’e hanesan projetu pilotu ne’ebé halo iha Lospalos. Maibé, ikus mai la halo eleisaun tanba iha 10 agostu kalan, UDT sira halo golpe kontra FRETILIN (11 agostu 1975). UDT sira lansa halo kapturasaun ba militante FRETILIN no líder FRETILIN ho razaun ida katak FRETILIN sira ne’e influénsia ba komunista. Dili laran lahakmatek.

Liu tiha loron 10, iha 20 Agostu 1975,  FRETILIN mós halo kontra golpe. Mosu funu sivíl tanba timoroan ho timoroan maka funu malu. La kle’ur, FRETILIN domina territóriu Timor laran tomak. Tanba sente lakon ona, UDT husik  tiha sira-nia sede iha Palapaço hodi halai ba Malinamuk-Comoro. Tanba FRETILIN duni nafatin sira, entaun liuhusi Atabae, sira tama ba Timor Osidentál, Indonézia.

Iha Indonézia, ema mós perpara deklarasaun ida atu Timor-Leste bele integarasaun ba Indonézia. Reprezentante partidu APODETI ne’ebé asina deklarasaun integrasaun ne’e maka Alexandre Borromeu, partidu UDT reprezenta hosi Domingos Oliveira, partidu KOTA reprezenta hosi José Martins, partidu Trabalhista reprezenta hosi Domingos Pereira. Hafoin asina deklarasaun  ne’e, UDT husu ba governu Indonézia katak sira prontu atu fila mai Timor-Leste maibé Indonézia tenke fó apoiu materiál funu nian. Segundu, sira husu ba tropa Indonézia para fó apoiu ba sira, mai funu ho FRETILIN.

Maibé, iha tempu ne’ebá, membru Komando Pasukan Khusus (KOPASUS) sira komesa halo infiltrasaun no hahú provoka eh halo intimidasaun ba populasaun sira ne’ebé hela iha fronteira. Provokasaun ne’e,  provoka duni jornalista na’in lima hosi Austrália atu halo kobertura iha fronteira Balibo. Jornalista sira hosi Dili, aranka ba fronteira hodi halo kobertura ba intimidasaun sira ne’e hodi divulga ba rai li’ur.  Jornalista na’in lima ne’ebé halo kobertura maka naran; Brian Cunningham, Malcolm Rennie, Greg Shackleton, Tony Stewart no Brian Peters.

Tanba Indonézia haree katak situasaun ka intimidasaun sira ne’ebé sira halo ne’e kontra ka viola direitu umanu (krime), entaun sira desidi oho tiha jornalista na’in lima ne’e, iha 16 outubru 1975. Maibé, sira fase-liman hodi dehan katak sira la oho maibé FRETILIN sira maka oho jornalista sira ne’e. Maski nune’e, jornalista Portugal, Adelino Gomes, ne’ebé antes loron rua mai kotuk halo entrevista ho jornalista Greg Shackleton ne’e hatete, “Ita iha prova katak membru KOPASUS sira maka oho jornalista na’in lima ne’e, la’ós FRETILIN sira maka oho.”

Efeitu hosi golpe ka funu sivíl ne’e, rezulta mós refujiadu timoroan barak maka la’o ain hosi fronteira tama ba Timor Osidentál, Indonézia. Maibé, timoroan grupu ida hein ró-ahi iha Portu Dili atu sai ba rai li’ur. Ró-ahi “MacDili” [ema dehan ró-ahi Macau Dili] hosi Austrália mai tula timoroan sira iha Portu Dili, hodi refujia ba iha Austrália.

Tanba haree situasaun iha Timor la hakametek ona maka Governadór Timor Portugés da-ikus iha Timor,  Lemos Pires evakua (26 Novembru 1975) tiha ba iha Illa Ataúro tanba razaun seguransa. FRETILIN domina Dili. Tanba haree katak illa Timor laiha ona na’in, administrasaun vakum, entaun líder FRETILIN (Xavier Amaral, Nicolau Lobato no sst) preokupa hodi túr hamutuk no hili loron ida atu deklara  Timor-Leste nia independénsia ba mundu.

Iha 28 novembru 1975, unilateralmente, FRETILIN deklara ka proklama Independénsia ba mundu. Iha biban ne’ebá, Francisco Xavier do Amaral nia kualidade nu’udár Prezidente FRETILIN, la’ós Prezidente RDTL. Hafoin proklama independénsia maka Francisco Xavier do Amaral eleitu sai Prezidente RDTL no ninia Vise Prezidente FRETILIN, Nicolau Lobato, eleitu sai Primeiru-Ministru Timor-Leste ba dahuluk.

Deklarasaun independénsia ne’e, nasaun barak la rekoñese. Nasaun sira ne’ebé rekoñese Timor-Leste nia independénsia maka Xina, Cuba, Vietname, Cambodia, Fijí no Nova Zelandia. Portugal rasik mós la rekoñese Timor-Leste nia independénsia. Sira dehan, atu integrasaun ka atu independénsia, Portugal sei konsidera Timor-Leste hanesan ninia provínsia ultramarina, iha ninia administrasaun ka ninia territóriu.

Liu tiha loron balun, iha 5 dezembru 1975,  Prezidente Estadu Unidu Amérika (EUA), Geral Ford no Ministru Negósiu Estranjeiru EUA, Henry Alfred Kissinger halo vizita ba Xina-Peking. Maibé, sira mós halo vizita badak ida iha Indonézia hodi hasoru malu ho Prezidente no Vise Prezidente Indonézia, Soeharto no Adam Malik, hodi ko’alia kona-ba estatutu Timor Portugés ho influensia komunista. Entaun, Amérika fó ‘lampu verde’ ba Indonézia  tama mai Timor-Leste, Amérika [inlkui Austrália] fó apoiu materiál funu nian no fó apoiu treinamentu teknikál ba forsa Indonézia hodi invade Timor-Leste.

Jornalista: Cancio Ximenes

Editór: Xisto Freitas

 

 

 

HAKEREK NO HATÁN

Please enter your comment!
Please enter your name here