Udan boot, horseik, iha Kosta Súl rezulta ema ida lakon no ponte tolu kotu. Imajen/Dezastre Naturais

DILI, 13 maiu 2019 (TATOLI)– Udan boot ne’ebé akontese iha area tasi mane nian, horiseik, rezulta ema ida lakon no ponte tolu kotu.

Vitima dezastre naturais iha Kosta Súl simu sasan emerjensia. Imajen/Dezastre Naturais

Dezastre ne’ebé afeta maka’as ba povu sira iha area kosta súl nian sai preokupasaun ba ema hotu. Ho nune’e, liuhosi plenária Parlamentu Nasionál, ohin, membru Parlamentu Nasionál hosi Bankada Kongresu Nasionál Rekonstrusaun Timorense (CNRT-sigla portugés), Gabriel Soares, husu ba ministériu relevante atu responde situasaun dezastre natural ho imediatu.

“Situasaun dezastre natural ne’ebé povu hasoru iha kosta súl, tasi mane nian, horiseik, rezulta ponte kotu iha Natarbora, Viqueque inklui Same, enkuantu ema ida lakon tanba mota boot no to’o agora seidauk hetan nia mate isin”, informa Deputadu Gabriel Soares iha sesaun plenária PN.

Informasaun ne’ebé Deputadu ne’e transmite iha plenária katak, juventude  sira hosi Natarbora organiza malu hodi buka tuir vítima ne’ebé lakon tanba mota boot, maibé to’o agora seidauk hetan nia mate isin.

Nia mós husu ba ministériu relevante atu responde imediatu ba situasaun ponte tolu ne’ebé kotu, tanba ponte hirak ne’e maka bele fasilita asesu transporte ba povu sira no husu atu estabelese brigada hodi bele fó asisténsia lais ba situasaun sira ne’e.

Parte seluk, Prezidente Bankada Frente Revolusionáriu Timor-Leste Independente (FRETILÍN), Francisco Miranda Branco, akresenta, horiseik, udan boot iha kosta súl lori prejuizu boot ba populasaun sira, daudaun ne’e estrada kotu iha Viqueque, Same no Manatutu, hodi halo kosta súl izoladu loos.

Deputadu Francisco Miranda Branco husu ba Ministériu Obras Públikas atu bele providénsia mákina pezadu sira atu hadi’a lais ponte, nune’e, bele normaliza fali transporte. Nia mós husu ba Ministériu Solidariedade Sosiál no Inkluzaun (MSSI) atu bele ajuda família hirak ne’ebé afeta ba inundasaun.

Hatán ba kestaun hirak ne’e, Ministru Reforma Lejizlativa no Asuntu Parlamentár, Fidelis Leite Magalhães, informa katak, Ministériu Obras Públika rejista ona no halo ona atuasaun ba dezastre iha kosta súl nian.

Ministru Fidelis Leite Magalhães esplika, iha munisipiu hirak ne’ebé afetadu ba dezastre, iha brigada ka ekipamentu sira hodi tau matan ba situasaun ne’ebé akontese iha ne’ebá.

“Foin lais, ami simu informasaun hosi Queliqai tun ba Uaibobo, iha estrada kotu iha ne’ebá, ida ne’e mós iha kedan atuasaun”, informa Ministru Fidelis Leite Magalhães.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here