Prezidente Tribunál Rekursu, Deolindo dos Santos. Imajen/Egas Cristovão

DILI,13 maiu 2019 (TATOLI)-Prioridade ida hosi planu Tribunál Kontas nian iha tinan ne’e mak konsentra servisu auditoria ba kazu pendente hamutuk 19 ne’ebé mak rejista iha inísiu 2019.

“Ami iha planu asaun 2019 katak, labele aprova tan prosesu foun kuandu prosesu pendente iha hela, tanba ne’e tenke halo hotu lai prosesu pendente depois maka halo tan buat foun”, informa Prezidente Tribunal Rekursu, Deolindo dos Santos, ohin, hafoin relata servisu ba Prezidente Repúblika,  Francisco Guterres Lú Olo, iha Palásiu Prezidensiál, Bairru-Pité, Dili.

Kazu haat  aprovadu hosi total kazu pendente 19, hanesan edifísiu Komisaun Funsaun Públika no seluk tan. Tuir planu sei finaliza tan kazu rua iha tempu badak. Maibé, Prezidente Tribunál Rekursu ne’e friza katak, lei la permite atu públika instituisaun sira ne’ebé maka tama iha lista auditória bainhira prosesu ne’e sei lao hela.

“Kazu sira ne’ebé sei pendente hela, ha’u labele hatete ba ita boot sira tanba lei mós la permite, agora sira ne’ebé aprova ona maka Edifísiu Komisaun Funsaun Públika no tolu seluk”, Deolindo dos Santos hateten.

Nia afirma tan, Tribunal Kontas sei la simu tan kazu foun  ne’ebé la urjénsia bainhira seidauk finaliza prosesu kazu pendente.

“Buat balun maka Tribunal haree iha importánsia ba estadu  no nasaun entaun Tribunal Kontas ka Kámara Kontas sei halo planu atu haree”, tenik  Deolindo.

Kna’ar Tribunal Kontas maka atu asegura ezekusaun orsamentu estadu kada tinan tenke tuir lei hodi prevene korrupsaun.

Jornalista   : Agapito dos Santos

Editór         : Francisco Simões

 

HAKEREK NO HATÁN

Please enter your comment!
Please enter your name here