Sidadaun estranjeiru sira ne'e mak Servisu Migrasaun deporta ona ba sira nian nasaun. Foto António Gonçalves

DILI, 13 maiu (TATOLI)Hahú hosi janeiru to’o abríl 2019, Diresaun Jerál Servisu Migrasaun (DNSM) konsege prosesa sidadaun estranjeiru mai hosi nasaun oioin hamutuk   na’in 105 maka viola regra.

Hosi totál númeru ne’e, Migrasaun halo ona deportasaun ba sidadaun estranjeiru hamutuk na’in 16, tanba sala utiliza vistu turista hodi mai servisu iha TL.

“Hosi sidadaun 105 ne’e ita haruka fila ona sira na’in 16 ba Indonézia. Restu ita sei prosesa iha investigasaun,” informa Diretór Jerál Servisu Migrasaun, Superintendente Asistente Polísia, Boavida Ribeiro “Bobby” ba Agência Tatoli iha nia kna’ar fatin, Vila-Verde, Dili, sesta (10/05) liu-ba.

Nia haktuir, ema estranjeiru ne’ebé viola vistu barak liu maka Indonézia ne’ebé balun hetan kapturasaun iha Dili, Baucau no fatin seluk tan.

Ema hirak ne’e, Boavida informa, kaptura hosi Serbisu Migrasaun liuhosi operasaun ekipa Setór Operasaun, Divizaun Kontrolu no Monitorizasaun iha 13 abríl 2019, tanba uza vistu turista hodi halo fali negósiu tama-sai uma no servisu badaen iha konstrusaun uma privadu balun.

Migrasaun kaer mós sidadaun na’in 9 hala’o atividade profisionál lahó dokumentu kompletu. Tuir lei, pesoál sidadaun estranjeiru ne’ebé viola regra sei selu $200 to’o $1000 kada ema no kompañia nasionál no internasionál sira ne’ebé fó servisu ba sidadaun estranjeiru sein dokumentu legál sei selu multa $750 to’o $1.500 kada kompañia.

Lei orgánika PNTL nian númeru 30/2009, konsidera Servisu Migrasaun hanesan mós autoridade órgaun polísia kriminál ida.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here