Komandante Komandu Operasaun Nasionál (KKON), Superintendente Xefe Pedro Belo. Imajen/PNTL .

DILI, 13 maiu (TATOLI)—Di’ak ka lae? Ita serbisu kle’ur ona maka jornalista foin mosu mai entrevista ne’e. La fiar liu. He-he-he.

Liafuan amizade ida ne’e, Pedro Belo hasee ba jornalista Agência Tatoli iha nia kna’ar fatin, Kuartél Jerál PNTL, Caicoli, Dili, sesta (10/5/2019). Jornalista Tatoli la’ós oin foun ba nia. Sai ona belun di’ak ba nia. Tan ne’e, bainhira hasoru malu, nia la dada. Hanoin hetan liafuan saida, tuda dadaun ba.

Nia moris iha Baucau, maibé mututaba (laran di’ak). La’ós muturabu hanesan ema balun ko’alia. Ninia lian kro’at no dala wa’in kuandu ko’alia halo ema hakfodak. Maibé, nia laran di’ak. Nia ema ida ne’ebé la foti án. Sé de’it maka nia koñese ona, nia la la’o liu. Nia sempre hasee.

Ba nia, asumi kargu la’ós atu separa ema. Satán diskrimina ema. Ne’e la’ós ninia karáter. Kargu iha atu serbí ema. Hametin amizade ho povu. Aprosima povu.

Komportamentu ida ne’e, lori ninia kareira hahú iha mudansa. Hosi Komandante Polísia Nasionál Timor-Leste (PNTL) Munisípu Dili, nia promovidu ba kargu foun. Belo agora sai Komandante Komandu Operasaun Nasionál (KKON).

Kualker kargu, la sees hosi dezafiu. Maibé, eis Komandante PNTL Munisípu Baucau ne’e la ta’uk ba dezafiu. Nia konsidera dezafiu hanesan esperiénsia ida.

“Kna’ar foun (Komandante Komandu Kooperasaun Nasionál) ne’e mai hosi órden hosi komandante jerál PNTL iha loron 1 abríl 2019. Ha’u sente katak bainhira ita asumi kargu foun ida, ita mós sei hasoru dezafiu ida. Maibé, sente dezafiu sai hanesan esperiénsia foun ida ita bele hasoru iha oin atu servisu hamutuk ho komandante hotu-hotu,” dehan Pedro Belo ho hamnasa.

Desizaun ba konfiansa ne’e hato’o hosi despaixu Komandante Jerál Polísia Nasionál Timor-Leste (PNTL), Komisáriu Faustino da Costa hodi troka eis Komandante Operasaun Superintendente Xefe, Hendrique da Costa.

Nia agradese tebes bainhira hetan fiar hosi komandante jeral PNTL hodi lidera kna’ar foun KKON no nia husu komandante PNTL hotu-hotu hosi nasionál to’o munisípiu atu apoiu malu iha servisu hodi lori PNTL hetan fiar aas liu-tan hosi Estadu no povu.

Pedro dehan, bazeia ba kompeténsia servisu ne’ebé nia iha maka sei tau matan liu-ba servisu  Ofisiál Polísia Suku (OPS) hotu-hotu inklui Tránzitu Rodaviáriu nian.

“Ami sei dezenvolve maka’as liu mak servisu OPS no Tránzitu Rodaviáriu rezolve problema rua ne’e atu hetan solusaun,,” nia hateten.

Atu dezenvolve servisu hirak ne’e, nia tenik, Komandante Jerál PNTL aprova ona programa servisu ekipa ne’ebé nia lidera atu dezenvolve servisu hodi hetan progresu no rezolve problema sira ne’ebé iha OPS no Tránzitu Rodaviariu nian.

Jornalista: Eugénio Pereira 

Editór: Xisto Freitas

HAKEREK NO HATÁN

Please enter your comment!
Please enter your name here