Konselleiru MCC Hasoru MNEK. Foto TATOLI: Nelia Rosario

DILI, 13 maiu 2019 (TATOLI)- Ministru Negósiu Estranjeiru no Kooperasaun (MNEK), Dionisio Babo Soares simu vizita hu kortezia husi Konselleiru MCC (Millennium Compact Challenge), David, hamutuk ho Diretór Ezekutivu MCC Timor-Leste, Constâncio Pinto hodi ko’alia kona-ba oinsá atu hamenus ki’ak iha Timor-Leste.

“Iha setór privadu barak maka ta’uk atu mai investe iha Timor-Leste. Nune’e ho prezensa MCC nian, ohin, iha Ministériu Negósiu Estranjeiru no Kooperasaun ne’e atu diskute no peskiza kona-ba asuntu refere,” informa Ministru Dionísio Babo Soares ba Ajénsia TATOLI, iha edifísiu MNEK, Praia dos Coqueiros, Dili, sesta (10/05).

Tuir governante ne’e katak MCC halo ona projetu boot ida kona-ba oinsá atu halakon ki’ak iha ita nia rai. Alende ne’e, iha setór privadu barak maka ema lohi bainhira sira mai iha ita- nia rai, nune’e fila, la iha rezultadu. “Ida ne’e halo ambiente bisnis (negósiu) iha Timor-Leste ne’e, tuir Banku Mundiál no komunidade nasionál seidauk di’ak to’o agora”.

“Kompañia Heineken no Timor Cement de’it maka investe. Haree fali ba iha Telekomcel, Timor Telkom no Telemor ne kompañia estranjeira, maibé fundu ka osan ne’e foti husi Timor maka sai ba li’ur, la’ós mai investe osan hodi tau timoroan atu serbisu no prodús fali,” konsidera Ministru Dionisio Babo Soares.

Nune’e, ministru hateten, liuhusi vizita ekipa MCC ne’e atu rekomenda ba MCC no mós Governu Timor-Leste hodi bele haree saida maka Timor-Leste bele halo.

Iha enkontru ne’e, diplomata timoroan ne’e mós akresenta, dezenvolvimentu  ne’ebé maka Timor-Leste hala’o tiha ona mak hanesan levantamentu MCC nian kona-ba rai no lei rai nian ne’ebé promulga ona husi Prezidente Repúblika nune’e mós Planu atu harii Komisaun kona-ba rain nian hodi fó serteza legál ba konsumidór sira.

Ministru Dionísio Babo Soares mós hateten, Timor-Leste presiza iha órgaun espesiál atu impoen ka reinforsa lei ba ema sira halo kontratu ne’e hodi bele kumpre ba sira nia kontratu. “Problema sira ne’e hotu maka sai hanesan tópiku ida ne’ebé ko’alia iha ámbitu MCC”.

Lee mós notísia: http://www.tatoli.tl/2018/07/mcc-sei-oferese-rihun-750-ba-tl-reduz-kiak/

http://www.tatoli.tl/2018/02/mcc-eua-vizita-timor-leste-koalia-programa-halakon-kiak/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here