Ministériu Interiór (MI) no Sekretáriu Estadu Protesaun Sivíl (SEPS) no diresaun sira aprezenta planu estratéjiku no programa prioridade tinan 2020 ba Ministériu Finansas (MF) no Unidade Planeamentu Monitorizasaun no Avaliasaun (UPMA). Imajen Servisu Migrasaun

DILI, 13 maiu (TATOLI)—Diresaun Jerál Servisu Migrasaun (DNSM),  prevé osan hamutuk miliaun $5 ba planu orsamentu jerál Estadu (OJE) tinan 2020 nian.

Orsamentu ne’e rasik aprezenta ona hosi Ministériu Interiór (MI), Sekretáriu Estadu Protesaun Sivíl (SEPS) no diresaun sira seluk hodi hare mós ba planu estratéjiku no programa prioridade tinan 2020 ba Ministériu Finansas (MF) no Unidade Planeamentu Monitorizasaun no Avaliasaun (UPMA).

Diretór Jerál Servisu Migrasaun, Superintendente Asistente Polísia, Boavida Ribeiro “Bobby” dehan, formulasaun orsamentu ne’ebé aprezenta atu atu hatene polítika, estratéjia no prioridade infernál no esternál ba atinje meta anuál, médiu no longu prazu.

“Kalkulasaun provizóriu ami husu miliaun $5 ba planu tomak migrasaun nian, maibé orsamentu ita sei haree no debate,”dehan Boavida ba Agência Tatoli iha nia kna’ar fatin, Vila-Verde, Dili, sesta (08/05).

Tuir planu, nia esplika, Servisu Migrasaun na’in sei halo transformasaun no modernizasaun to’o tinan 2020, iha ne’ebé sei fahe ba komponente haat mak hanesan komponente jestaun fronteira, operasionál, lojístika administrasaun no lejizlasaun nian.

“Planu prioridade ita nian maka atu moderniza servisu ba atende ita-nia públiku. Ita sei habelar tan Servisu Migrasaun nian iha territóriu hotu. Ita mós iha ona planu atu tau delegasaun territóriu iha Baucau, Suai no Maliana, nune’e bele alastra ita-nia kontrolu fiskalizasaun ba sidadaun estranjeiru sira,” Boavida informa.

Ba oin, nia salienta, Servisu Migrasaun sei sosa tan materiál servisu balun hanesan karreta no ekipamentu modernu hodi reforsa Servisu Migrasaun nian bele la’o tuir planu.

Jornalista: Eugénio Pereira  

Editór: Xisto Freitas

HAKEREK NO HATÁN

Please enter your comment!
Please enter your name here