Prezidente Autoridade Portuária Timor -Leste (APORTIL) Costantino Soares, Imajen/Egas Cristovão

DILI, 13 maiu 2019 (TATOLI)-Prezidente Autoridade Portuária Timor-Leste (APORTIL), Constantino Soares, informa, kontentór ida husi Arkivu Muzeu Rezisténsia Timor-Leste (AMRT) ne’ebé maka iha Portu Dili hasai ona.

Prezidente APORTIL relata, kontentór to’o iha Timor-Leste iha 21 marsu 2019 no pedidu izensaun ba Ministru Transporte no Komunikasaun foin fó entre 23 ou 24 abríl tinan ne’e no despaxu tun iha maiu nia laran.

“Ha’u-nia pergunta mak tanba saida kontentór to’o iha marsu nia laran sira la trata. Ha’u husu ba reprezentante AMRT no mós SDV ne’ebé trata kontentór ne’e dun malu. Despaxante dehan sira la simu dokumentu orijinál husi AMRT no AMRT dehan ami selu tiha ona ba despaxante (broker). Ami iha pozisaun ida hein, kuandu sira na’in-rua trata hotu ona, sira kompleta ona dokumentu Alfándega nian lori deliver order mai kontentór imediatamente sai”, Prezidente APORTIL, Constantino Soares, afirma, ohin, iha Portu Dili.

Sobre prosesu atrazu hasai kontentór ne’ebé tau dokumentu rezisténsia pur volta pasta dokumentu 175 ne’ebé importa husi Fundasaun Mário Soares mai Timór ne’ebé inklui objetu hanesan moxila, farda antigu no surat-tahan ne’e nia prosesu atrazu husi AMRT rasik ho SVD nu’udar despaxante.

“Tanba sira na’in-rua dudu malu. Ha’u husu ba despaxante dehan AMRT la fó invoice, bill of lading, la fó dokumentu seluk komprovativu ne’ebé orijinál. Atu dokumentu ne’ebé relasiona ho despaxu ba kontentór ida tenke orijinál, pur tantu atrazu ne’e entre sira, la’ós entre APORTIL ho Alfándega”.

Bainhira despaxu ministru tun hatete katak prosede tuir lei no regulamentu ne’ebé vigór, signifika APORTIL aplika lei ne’ebé vigora. Tanba despaxu tun ona no razaun husi AMTR katak ta’uk sasán sira aat iha kontentór laran tanba dokumentu valiozu maka Prezidente APORTIL toma desizaun ho despaxu ministru nian fó ona dalan atu autoriza sai kontentór ne’e no kontentór sai tiha ona iha Sesta-feira (10/05/2019).

Tuir regulamentu APORTIL nian kontentór ne’ebé tama iha Portu Dili bainhira liu ona loron lima sei selu demurrage ne’ebé bazeia ba tempu no dimensaun kontentór ne’ebé iha 60 feetselu US$60 kada loron no 20 feet US$25 pur dia no feriadu sábadu no domingu la sura.

Prezidente APORTIL salienta, hafoin despaxu husi ministru, tuir regulamentu AMRT tenke seludemurrage, maibé ho montante ne’ebé la boot mak US$750.

 Nia tenik, relasiona kontentór ne’ebé rai kleur iha portu ne’e nia konsekuénsia boot tanba kustu boot liu no okupa fatin iha portu no mós sasán sira iha kontentór laran bele aat.

APORTIL adota prosedimentu ida simples bainhira dokumentu komprovativu hotu, sasán bele sai no invoice tuir tanba tuir regulamentu Governu nian sasán ne’ebé maka pertense ba ministériu obrigatóriu selu ba portu no Alfándega.

“Ba ami sasán ne’ebé to’o, sai di’ak liu no lakohi tahan tanba fatór tolu, kustu aumenta, sasán bele estraga no okupa espasu, mas ami depende ba prosesu dokumentu ne’ebé iha, se dokumentu akaba lalais fó sai ona”, hateten Constantino Soares.

Notísia relevante : http://www.tatoli.tl/2019/05/purvolta-175-pasta-dokumentu-rezistensia-iha-ona-portu-dili/

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here