Foto Primeiru vice Gov. Banco Central TL, VFilipe Nery Bernardo (koordenador Unidade Fundu Petroliferu Ministeriu Financas

DILI, 13 maiu 2019 (TATOLI) –Ekipa Komité Asesória Investimentu Fundu Petrolíferu (KAIFP) husi Ministériu Finansa (MF), Banku Sentrál Timor-Leste (BCTL-sigla portugés) no Konsellu Konsultivu Investimentu Fundu Petrolíferu, hasoru malu ho Primeiru-Ministru (PM), Taur Matan Ruak hodi rona planu governu ba oin.

Koordenadór Unidade Administrasaun Fundu Petrolíferu Ministériu Finansa, Filipe Nery Bernardo haktuir, enkontru ho Xefe Governu hanesan enkontru kortezia, hodi haree ba oin saida mak ekipa ne’e bele halo ba governu.

“Enkontru ne’e hodi ko’alia kona-ba saida mak konsellu ne’e halo hodi bele suporta governu, relasiona ho jestaun fundu petrolíferu nia ba oin, rona husi Primeiru-Ministru nia hanoin kona-ba planu governu nia ba oin, oinsá atu utiliza fundu ba tempu naruk ho sustentabilidade fundu nian,” informa Koordenadór Filipe Nery Bernardo ba jornalista sira iha Palásiu Governu, segunda (13/05).

Tuir Filipe, komité ne’e fó asesória no konsellu ba MF kona-ba investimentu fundu iha rai li’ur no uzu fundu kada tinan.

“Investimentu fundu iha rai li’ur mais ou menus nasaun 23; barak liu iha Amérika, no iha nasaun dezenvolvidu sira,” hateten koordenadór ne’e.

Nia mós dehan, retornu investimentu depende ba alokasaun no mudansa ba merkadu ne’ebé hanesan investimentu ba tempu naruk tanba mudansa sempre iha. “Iha tempu naruk ita bele hetan, espera bele iha retornu ne’ebé di’ak”.

“Buat ne’ebé tenke konsidera mak nível levantamentu kada tinan, bainhira halo alokasaun tenke hare ba kestaun ne’e, hodi bele haree aloka hodi tau iha ne’ebé de’it tanba ne’e importante,” tenik tan.

Hodi relata: “Ohin komité mós husu oinsá planu governu ba oin atu uza orsamentu, ne’ebé ekipa ne’e nafatin mantein desizaun ne’ebé MF halo ona, nune’e PM dehan bainhira iha ideia ruma di’ak governu bele konsidera”.

 Jornalista      : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here