Prezidente Autoridade Portuária Timor -Leste (APORTIL), Costantino Soares, Imajen/Egas Cristovão

DILI, 13 maiu 2019 (TATOLI)-Autoridade Portuária Timor-Leste (APORTIL) to’o oras ne’e seidauk bele liberta kontentór ida hosi grupu traballadór Koreia  Súl nian, tanba APORTIL  hein hela  kontaktu foun hosi Sekretáriu Estadu Formasaun Profisionál no Empregu (SEFOPE).

Kontentór traballadór timoroan hosi Koreia Súl ne’e to’o dezde tinan kotuk no seidauk sai tanba prosesu ladauk hotu no kontentór ne’e prienxe ho rede kail ne’ebé sosa iha país refere atu grupu ne’e mai halo negósiu peska nian, ne’ebé suporta husi Governu ho ró hodi bele lori to’o mai Timór, aléinde ne’e iha mós sasán Governu nian hanesan komputadór.

“Ami hein hela, tanba ha’u hasoru tiha ona Diretór Jerál SEFOPE, ha’u hein hela sira-nia kontaktu foun kuandu mai kompletu hotu ona, ha’u liberta kontentór sira ne’e, naran katak ita tuir nia prosedimentu legál sira ne’e”,  hateten Prezidente APORTIL, Constantino Soares, ohin, iha Portu Dili.

“Sasán rede ho komputadór ne’e tama dezde tinan uluk, tanba saida maka la trata? La klaru sé maka trata dokumentu ne’e, sé maka toma konta asuntu ne’e?”.

Ho kestaun ne’e Prezidente APORTIL hasoru malu ona ho Diretór Jerál SEFOPE no esplika problema ne’e ba nia no diretór jerál SEFOPE fó tiha ona karta ba Ministru Transporte no Komunikasaun nia konsiderasaun no ida ba Ministra Finansa.

“Mas iha ne’ebá hakerek klaru katak tenke kumpre regulamentu ne’ebé vigór. Ha’u tenke kumpre despaxu ne’e, se ha’u viola despaxu ne’e, ha’u iha pozisaun ida ne’ebé sala”.

Pur tantu sasán sira ne’e sei mantén iha Portu Dili to’o iha finalizasaun prosesu dokumentu hotu. “Ami simu orden, kuandu orden klaru ami ezekuta”.

Iha Sétimu Governu nia tempu, grupu traballadór sira ne’ebé kompostu hosi ema na’in-haat hasoru malu ho Primeiru-Ministru no hato’o preokupasaun hodi bele selu taxa ho presu labele aas demais tanba iha kontentór ne’e iha mós sasán Governu nian no mós grupu ne’e atu loke negósiu hodi fó servisu ba timoroan hodi lori abilidade ne’ebé sira hetan durante servisu iha Koreia Súl.

“Taxa tenke selu duni, maibé labele boot demais tanba ami seidauk iha kapasidade atu selu nia”, dehan Diretór Montana Marítima Group, Aniceto da Silva, ba jornalista sira iha Palásiu Governu depois soru-mutu ho Primeiru-Ministru iha momentu ne’ebá (16/1/2018).

Diretór Montana Marítima Group ne’e dehan, sasán ba peska nian ne’e sira-nia grupu sosa ho montante US$20.000.

http://www.tatoli.tl/2018/01/kontentor-trabalhador-timoroan-husi-korea-sul-paradu-iha-portu-tibar/

Jornalista   : Maria Auxiliadora

Editór         : Francisco Simões

 

HAKEREK NO HATÁN

Please enter your comment!
Please enter your name here