Administradór Munisípiu Manufahi, Arantes Isaac Sarmento

MANUFAHI, 11 maiu 2019 (TATOLI)—Administrasaun Munisípiu Manufahi oras ne’e hahú deskuti inklui halo orsamentu estimativa ba tinan 2020 nian.

 “Planu Munisípiu nian ne’ebé ami tau ona iha 2020 depois halo koordenasaun ho nível nasionál, ita iha  projetu hamutuk 45 mak hato’o. Prioridade ne’ebé ita atu halo mak primeiru infraestrutura bázika ne’ebé mak liga ho bee-moos no estrada,” Administradór Munisípiu Manufahi, Arantes Isaac Sarmento, ko’alia hafoin partisipa iha vizita Sekretáriu Estadu Komunikasaun Sosiál, Merício Akara, ba Rádiu Komunidade 1912, Same Vila, Munisípiu Manufahi, sábadu (11/5/2019).

Nune’e mós, nia dehan, hanoin atu konstrui edifísiu kada serbisu munisipál ne’ebé maka durante ne’e laiha edifísiu, entaun ida ne’e planu datoluk mak atu dezenvolve área turizmu iha Manufahi. Dahaat mak harii dormitóriu ba extensionista sira.

Arantes esplika, oras ne’e planu hirak ne’e foin mak tama iha orsamentu estimativa hafoin aprezenta ba Komite Revizaun Orsamentu (KRO). “Ita tau iha orsamentu estimativa ne’e purvolta miliaun $25. Orsamentu ne’e ita tau bazeia ba ita-nia nesesidade ne’ebé iha,” nia haklaken.

 Arantes subliña, planu hirak ne’e tama hotu iha Programa Dezenvolvimentu Integradu Munisipál (PDIM) no responsabiliza másimu ne’e hosi munisípiu. Administradór ne’e haktuir, progresu PDIM nian antes ne’e halai liu-ba instituisaun Estadu sira, ne’ebé ninia progresu la’o di’ak tebes.

“Ita iha projetu ida to’o agora seidauk ramata, liliu ba konstrusaun edifísiu Bombeiru ninian seidauk ramata. Iha tempu badak ha’u sei bolu kompañia no fó xamada oinsá kontinua obra ne’e to’o ramata,” informa Administradór Munisípiu Manufahi ne’e.

Maibé projetu ida iha Turiscai ninian, tuir nia, projetu labele kontinua tanba la asesu ba estrada, entaun kompañia labele implementa. Oras ne’e desidi hapara kompañia no fó fali ba kompañia seluk.

Maibé, Arantes haklaken, projetu hotu-hotu ninia progresu fasilita duni instituisan Estadu sira. Ezemplu, Sentru no Postu Saúde no mós Sentru Uma ba TBC (tubercoluse) ninian, oras ne’e fasilita komunidade ho di’ak tebes.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here