Sekretariu Estadu Komunikasaun Sosiál, Merício Akara, hamutuk ho Administrador Munisípiu Manufahi, Arantes Isaac Sarmento, Xefe Gabinete SEKOMS, Júlio Gonçalves no Diretór Sentru Rádiu Komunidade, Abel da Conceição, vizita Rádiu Komunidade 1912 Manufahi, sabádu (11/5/2019). Foto Mídia SEKOMS

MANUFAHI, 11 maiu 2019 (TATOLI)—Governu liuhosi Sekretaria Estadu Komunikasaun Sosiál (SEKOMS), kompromete moderniza kondisaun rádiu komunidade iha territóriu nasionál.

“Kondisaun rádiu komunidade hotu-hotu tenke moderniza. Ida ne’e mak planu governu nian. Ita funsiona orsamentu dolár amerikanu rihun sanulu resin-lima (mil $15) ba kada rádiu komunidade atu hola transporte ka halu nusa, atu hola nesesidade sira seluk ka saida. Depende ba ita-boot sira halo jestaun,” Sekretáriu Estadu Komunikasaun Sosiál, Mericio Akara, ko’alia asuntu ne’e bainhira vizita Rádiu Komunidade 1912 Manufahi, sábadu (11/5/2019), ho objetivu atu observa sala redasaun no nesesidade bázika ne’ebe jornalista rádiu komunidade uza.

Nia dehan, rádiu komunidade importante tebes, tanba bele divulga prosesu dezenvolvimentu iha baze no programa ne’ebé implementa hosi governu lokál.

Governante ne’e esplika, funsaun rádiu komunidade importante liu mak eduka komunidade nia hanoin atu partisipa iha prosesu dezenvolvimentu. Tuir nia, neseidade bázika rádiu komunidade nian presiza tau atensaun hotu, nune’e funsionamentu rádiu la’o ho di’ak.

Entretantu, Diretór Sentru Rádiu Komunidade (CRC-sigla portgués), Abel da Conceiçao, hateten, rádiu komunidade importante iha sosiedade, tanba transmiti serbisu saida de’it iha governu lokál no komunidade akompaña.

“Komunidade bele akompaña informasaun kona-ba prosesu dezenvolvimentu iha nasaun ida ne’e,” dehan Abel.

Nia husu ba governu lokál atu hatama rádiu komunidade iha Planu Integradu Dezenvolvimentu Munisipál (PDIM). “Bele oferese rai hodi harii edifísiu rádiu nian iha futuru,” katak nia.

Hatán ba asuntu ne’e, Administradór Munisípiu Manufahi, Arantes Isaac Sarmento, dehan ezisténsia rádiu komunidade importante, tanba ne’e sei tau iha PDIM tinan oin.

Iha vizita ne’e akompaña hosi Xefe Gabinete Sekretaria Estadu Komunikasaun Sosiál, Júlio Gonçalves no Diretór Rádiu Komunidade (CRC-sigla portugés), Abel da Conceição. Rádiu Komunidade 1912 Manufahi iha jornalista na’in hitu inklui jestór ba rádiu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here