Prezidente Autoridade Portuária Timor -Leste (APORTIL) Costantino Soares, Imajen/Egas Cristovão

DILI, 13 maiu 2019 (TATOLI)-Prezidente Autoridade Portuária Timor-Leste (APORTIL), Constantino Soares, hatete númeru kontentór ne’ebé tama Timor-Leste iha 2018 iha diminuisaun porsentu ualu (8%).

Atividade hatuun no hasa’e kontentor ba ró iha Portu Dili. Imajen/espesiál

“Ha’u ko’alia importasaun, la ko’alia esportasaun tanba ita la esporta buat ida, se esportasaun kontentór sai ba mamuk. Ha’u ko’alia sobre importasaun kontentór iha diminuisaun porsentu ualu”, Prezidente APORTIL, Constantino Soares, informa, ohin, iha Portu Dili.

Redusaun ne’e afeta hosi impase polítika ne’ebé maka akontese tinan kotuk no APORTIL espera iha tinan ne’e kondisaun normál ona no iha aumentu signifikativu hanesan fali ho tinan anteriór ne’ebé mak iha situasaun di’ak nia laran.

Prezidente APORTIL salienta, normálmente kontentór tama mai Timór ne’e varia, depende ba kondisaun entre rihun 15 to’o rihun 20 iha anuál.

“Tanba saida mak sura de’it kontentór ida tama? Sai mós ekivalénsia entre kontentór rihun 15 ho rihun 20, signifika tinan ida ita iha kontentór rihun 38 to’o rihun 40. Kontentór ne’ebé tama mai nakonu 99,9, agora kontentór sira sai ne’e 99,9 mamuk tanba ita laiha sasán atu esporta”, nia esplika.

“Tanba saida mak ha’u lakohi sura kontentór mamuk tanba tenke re-esporta, nia tenke fila-fali bá nia orijen para fila-fali mai nia lori sasán, tanba ne’e maka kálkulu ne’e sura de’it mak kontentór importadu tanba sasán nakonu, ida sai ne’e mamuk”.

Iha parte seluk Prezidente Autoridade ne’e informa APORTIL iha estimativa ba reseita iha 2019 ne’e to’o millaun US$5.

Jornalista   : Maria Auxiliadora

Editór           : Francisco Simões

 

 

 

 

HAKEREK NO HATÁN

Please enter your comment!
Please enter your name here