Konsileiru Konsellu Imprensa (KI) ba asuntu Dezenvolvimentu Mídia, Hugo Fernandes

DILI, 9 maiu 2019 (TATOLI)—Konsileiru Konsellu Imprensa (KI) ba Asuntu Dezenvolvimentu Mídia, Hugo Fernandes, hateten Konsellu Imprensa nia kompeténsia ida maka halo ezame aptidaun ba jornalista sira. Ezame aptidaun ne’e,  loloos ne’e, aplika ona hafoin fó sertifikasaun ba jornalista sira ne’ebé maka uluk halo sira-nia serbisu kle’ur ka molok Lei Komunikasaun Sosiál eziste.

“Sira ne’ebé maka atu tama ba ezame aptidaun ne’e, sira ne’ebé maka hafoin lei komunikasaun ne’e hamriik. Ida ne’e prosesu naruk uituan,” dehan Hugo liuhusi entrevista hafoin abertura konferénsia internasionál Dili Diálogu Forum ba daruak iha salaun São José, Katedrál, Dili, kinta (9/5/2019).

Nia hatutan, to’o agora KI mós seidauk halo sertifikasaun ba instituisaun ne’ebé maka atu tulun Konsellu Imprensa atu halo ezame aptidaun. Konsellu Imprensa orsida atribui karteira profisionál ba jornalista sira maibé ezame la presiza Konsellu Imprensa maka halo.

“Ezemplu, aban bainrua, ita iha mídia sira ho kategoria jornalista sira ne’ebé mak hetan ona karteira profisionál maka iha nível editór no xefe redasaun, entaun KI bele atribui kompeténsia ba sira atu halo ezame aptidaun, depois KI sertifika. Maibé antes ba ezame aptidaun tenke liuhusi estájiu,” Hugo esplika.

Entretantu, nia hatutan, jornalista sira ne’ebé uluk seidauk simu karteira profisionál, agora nia prosesu la’ós hato’o de’it notifikasaun hodi KI atribui kedas karteira profisionál. Maibé tuir Lei Komunikasaun Sosiál,  sira tenke ba tuir ezame aptidaun maski la tuir ona estájiu.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here