Komandante Jerál PNTL, Komisáriu Faustinho da Costa ho Diretora Fundasaun Ázia, Paulina, lansa relatóriu Ofisiál Polísia Suku (OPS) 2018 ho pájina 24 iha lian tetun no inglés, iha Kuartél Jerál PNTL, sesta (10/09). Foto Mídia PNTL

DILI, 10 maiu 2019 (TATOLI)–Progresu implementasaun serbisu Ofisiál Polísia Suku (OPS) durante periodu 2018 hatudu rezultadu pozitivu ka atinje pursentu 80 (80%). 

Tuir relatóriu ne’ebé prodúz hosi Fundasaun Mahein (FM) ne’ebé hetan apoiu fundu kooperasaun hosi Embaixada Nova Zelándia no Fundasaun Ázia hatudu katak, prezensa OPS iha suku 452 lori mudansa di’ak hodi koopera ho autoridade halo prevensaun no rezolve problema krime no dezórden públiku.

Lansamentu relatóriu Ofisiál Polísia Suku (OPS) 2018 ho pájina 24 ho lian tetun no inglés, lansa direta hosi Komandante Jerál PNTL Komisáriu Faustinho da Costa ho Diretora Fundasaun Ázia, Paulina, Koordenadór Programa Dezenvolvimentu Nova Zelándia, Augusto Soares, Diretór Fundasaun Mahein, João Almeida, akompaña hosi Komandante Jerál PNTL munisípiu 12 inklui Rejiaun Administrativa Espesiál Oé-Cusse Ambeno (RAEOA), iha Kuatél Jerál PNTL, Caicoli, Dili, ohin.

Koordenadór Programa Dezenvolvimentu Nova Zelándia, Augusto Soares dehan, ho progresu serbisu ne’e sai orgullu ba Komandu PNTL liuliu OPS hodi kontinua hasa’e prestasaun serbisu di’ak iha sosiedade nia leet.

“Ita haree progresu serbisu ne’e hatudu pruvolta pursentu 80 (80%). Komunidade sira haree katak OPS sira iha suku ninia vizibilidade aas tebes hodi hamutuk ho komunidade rezolve problema sira ne’ebé mosu hosi komunidade porvolta pursentu 91 (91%) no pursentu 41 (41%) sira (povu) dehan OPS sira atende di’ak loos sira nia kazu,” tenik Augusto Soares ba Agêcia Tatoli.

Nia informa, peskiza ne’ebé Fundasaun Mahein halo haree kedas hosi serbisu tomak ne’ebé OPS prodúz hahú hosi tinan 2014 to’o agora.

Augusto hatutan, ho relatóriu ne’e bele ajuda PNTL no Governu Timor-Leste atu foti desizaun politika no tátika hodi apoia finanseiru Polísiamentu Komunitária ba progresu dezenvolvimentu PNTL.

Dezafiu ne’ebé peskiza ne’e indentifika, nia haktuir,  mak membru OPS balun seidauk domina didi’ak atu sosializa lei ba komunidade, tanba lei barak hakerek ho lian portugés entaun OPS balun la konsege kompriende konteúdu hosi lei balun.

“Lei barak maka hakerek ho lian portugés, entaun membru OPS balun la konsege kompriende didi’ak atu sosializa,” nia afirma.

Nia salienta, problema seluk tan maka OPS balun seidauk iha transporte atu hala’o serbisu no dalaruma OPS balun serbisu dupla funsaun.

Tuir planu, Nova Zelándia mós sei kontinua apoia serbisu OPS to’o dezembru tinan 2020 hodi hadi’a problema bele fó susesu aas liu-tan ba OPS nia kna’ar atu hamutuk ho komunidade garante pás no estabilidade.

Iha fatin hanesan, Komandante Jerál PNTL, Komisáriu Faustinho da Costa hato’o agradese ba Fundasaun Mahein, Embaixada Nova Zelándia no Fundasaun Ázia nia relatóriu hodi akompaña progresu serbisu OPS nian.

Komandante Jerál husu atu komandante PNTL hotu-hotu iha munisípiu tenki badinas halo relatóriu hodi aprezenta mós ba komandu PNTL atu bele iha informasaun no hatene serbisu OPS nian.

Komandante ne’e rekoñese distribuisaun lei nú. 5/2017 kona-ba regulasaun arte marsiál, lei Kódigu Penál, Kódigu Prosesu Penál no Kódigu Sivíl fó ba OPS prodúz ho lian portugés sai obstáklu atu introdúz ba komunidade.

Komisáriu Faustinho husu atu membru OPS maski hasoru dezafiu tenke kontinua implementa serbisu hodi fó serbisu ba prosesu harii pás.

Nia dehan, governu mós aprova ona programa prioridade polísia nian iha ualu (8) no programa ida maka apoiu formasaun área espesializada ba OPS.

Komandu PNTL liuhosi Departamentu Polísiamentu Komunitária Nasionál (DPKN) hamutuk ho parseiru estabelese ona estrutura polísiamentu komunitária hanesan Konsellu Seguransa Munisípiu (KSM) iha munisipiu 12 no Konsellu Seguransa Rejionál (KSR) iha Oe-Cusse no estabelese ona Konsellu Polísiamentu Komunitária (KPK) iha nível suku 246 hosi munisípiu 11 no RAEOA. Falta Munisípiu Lautém maka seidauk iha KPK.

Jornalista: Eugénio Pereira

Editór: Xisto Freitas

 

HAKEREK NO HATÁN

Please enter your comment!
Please enter your name here