Diretór Jerál Água no Saneamentu (SAS), Gustavo da Cruz

DILI, 09 maiu 2019 (TATOLI)—Diretór Jerál Água no Saneamentu (SAS), Gustavo da Cruz, husu komunidade tenke uza bee-moos ho konsiénsia, nune’e ema hotu bele aessu ba bee-moos.

Tuir nia, konsiénsia komunidade ne’e fahe ba eskada ida ne’ebé nível ekonomia ba leten. Eskada ida médiu mai kraik no ida seluk tún liu (ekonomia fraku).

“Sidadaun baibain ne’ebé ho rendimentu ne’ebé avansadu liu, nia bele hola rasik sanyo ka bolu kompañia ba fura rasik bee,” nia dehan ba Agência Tatoli iha nia kna’ar fatin, Caicoli, kinta (9/5/2019).

Nia informa, durante ne’e hakilar kona-ba bee-moos ne’e sosiedade klase ki’ik-liu, maibé sira ne’ebé ekonomia forte ne’e laiha.

“Durante ne’e ami haree komunidade ladún iha konsiénsia mak média ba leten, katak ema ne’ebé iha osan ka ema ne’ebé iha kapasidade finanseira, sira mak sala utiliza sira-nia kapasidade ekonomia ne’ebé iha,” Gustavo haktuir.

Diretór Jerál ne’e fó ezemplu, komunidade sira ne’ebé nia ekonomia médiu mai kraik, sira la halo ligasaun ilegál (sira la uza sala kanu distribuisaun), tanba sira prefere osan ba hola foos duké sira ba hola sanyo, nesesidade ne’e halai liu ba nia kabun.

“Agora ema ekonomia médiu ba leten nesesidade ba kabun la’ós importante ba nia, katak buat hotu-hotu tenke iha, entaun meiu ne’ebé nia iha, nia bele hola sanyo, nia bele hola saida de’it. Aktu ida ne’e implika ba kbi’it laek sira,” nia subliña.

Tanba ne’e, diretór ne’e kompromete sei asegura situsaun ne’e labele akontese tan no sei rezolve iha tempu badak.

Nia fó ezemplu, zona 10 perkore iha área Bidau tomak to’o Kristu Rei, tanba ne’e hetan ona despaixu hosi Ministru Obra Públika, Salvador Pires, atu kria ekipa Task Force ida halo intervensaun.

“Oras ne’e ami rezolve ona problema bee-moos iha Bidau Masaur, Santana, Metiaut no ami iha ona Kristu Rei. Bee sei la’o normál hotu. Ami mós sei koopera ho ministériu relevante atu haree sintina públiku sira iha Kristu Rei ne’ebé durante ne’e públiku preokupa. Tan ne’e, ami sei halo melloramentu para funsiona hikas,” nia katak.

Jornalista: Evaristo Soares Marins

Editór: Xisto Freitas

HAKEREK NO HATÁN

Please enter your comment!
Please enter your name here