Komandante Jerál PNTL, Komisáriu Faustinho da Costa. Imajen António Gonçalves

DILI, 10 maiu 2019 (TATOLI)–Komandu Jerál Polísia Nasionál Timor-Leste (PNTL) prevé ona iha orsamentu jerál   Estadu (OJE) tinan 2020 atu sosa motorizada foun ba Ofisiál Polísia Suku (OPS) sira iha Timor-Leste.

Motorizada ne’e Komandu PNTL sosa atu fó apoiu ba membru OPS sira hala’o serbisu besik liu-tan ba povu hodi sosializa lei no órden nune’e hamenus númeru konflitu no dezórden públiku.

Komandante Jerál PNTL, Komisáriu Faustinho da Costa dehan, komandu haree motór balun ne’ebé membru OPS sira uza utiliza liu ona tinan lima, bele fó lelaun ba membru OPS ne’ebé uza motór refere no mós ba membru sira seluk ne’ebé iha interese.

“Komandu observa motorizada balun tama ona ba tinan lima, tanba ne’e iha tinan 2020 komandu indentifika ona oinsá halo pedidu kompra hodi substitui ba motór sira ne’ebé iha sei submete ba prosesu lelaun interna,” informa Faustinho iha ámbitu halo lansamentu relatóriu ofisiál Polísia Suku (OPS) 2018 ho pájina 24 iha lian tetun no inglés, iha Kuartél Jerál PNTL, Caicoli, Dili, ohin.

Iha tinan 2015, nia haktuir, Komandu PNTL husu autorizasaun ba governu fó motór ba OPS sira atu jere rasik no to’o tinan lima liu bele hetan direitu ba lelaun.

Kona-ba totál motór sira ne’ebé sei sosa, Faustinho informa, komandu PNTL sei hein relatóriu hosi Departamentu Polísiamentu Komunitária Nasionál (DPKN) mak aprezenta.

Aleinde sosa motór, nia haklaken, Komandu PNTL sei fó mós formasaun rekursu umanu ba membru OPS atu hakbesik aan liu-tan ba komunidade hotu-hotu iha suku.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here