Diretór Operasaun AIFAESA, Gabriel da Costa. Imajen/Egas Cristovão

DILI, 10 maiu 2019 (TATOLI)-Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Costa, hatete, atu minimiza produtu liu prazu ne’e difisil no sempre iha hela de’it, maibé atu halakon ida ne’e maka AIFAESA hahú halo nia inspesaun iha distribuidór boot sira iha Timór laran.

“Oinsá mak AIFAESA halo para buat ne’e lakon tiha, entaun dalan atu bá ne’ebá maka ami bá uluk mak distribuidór sira ne’e. Sira mak sempre fornese (suplly) produtu sira ne’e ba ita-nia empreza ki’ik sira ne’e, entaun ami bá iha ne’ebá mak identifika”, Gabriel afirma, ohin, iha Matadouru, Dili.

Bainhira identifika no hetan produtu sira ne’e, AIFAESA ko’alia ho empreza no prosesa tuir lei. Entantu empreza sira hatene ona katak produtu liu ona data ka estragadu la rai ona iha armazein no hasai hodi fa’an ho folin baratu para hotu tiha.

“Se produtu ne’e to’o nia data atu hotu ona sira kontinua, antes ne’e sira fó hatene ona ami para halo destruisaun. Ne’e sira-nia konsekuénsia, sira lakon”.

Iha parte seluk sobre inspesaun ne’ebé AIFAESA halo husi janeiru to’o maiu ne’e ba estabelesimentu hamutuk 371 no ida ne’ebé komete infrasaun iha 58 ne’ebé maka fa’an produtu liu prazu no estragadu no mós lisensa laiha, lisensa mate no lisensa la tuir atividade no produtu sira arrependidu mak sigarru.

“Agora daudaun AIFAESA hetan produtu sira ne’e tanba ami la bá halo inspesaun iha loja, supermerkadu ou kioske de’it, maibé ami tama to’o sira-nia armazein, entaun iha armazein sira ne’e maka ita haree komete irregularidade ne’e barak iha ne’ebá hanesan produtu sira ne’ebé expire, estragadu sira tau hamutuk ho produtu sira ne’ebé di’ak, entaun ida ne’e lei la fó dalan”.

Jornalista : Maria Auxiliadora

Editór       : Francisco Simões

HAKEREK NO HATÁN

Please enter your comment!
Please enter your name here