Ministru Justisa, Manuel Cárceres da Costa. Imajen/Egas Cristovão

DILI, 10 maiu 2019 (TATOLI)-Governu liuhosi Ministériu Obras Públika sei uza espasu rai iha área eis kazerna 744, militár Indonézia (TNI-sigla Indonézia), Becora-Dili, atu harii bairru foun ba komunidade iha futuru.

Ba planu estabelesimentu bairru foun ne’e, ohin, Ministru Justisa, Manuel Cárceres da Costa, ho Primeiru-Ministru, Taur Matan Ruak, hahú halo diskusaun atu haree oinsá bele fó legalizasaun tuir lei  ba MOP atu sai na’in ba propriedade estadu ne’e hodi implementa projetu refere.

“Ohin, Primeiru-Ministru bolu ha’u hodi ami na’in rua ko’alia kona-ba rai ida iha eis kazerna 744 (TNI) hodi fó ba Obras Públika hodi halo  kontrasaun uma ba populasaun”, informa Ministru Manuel Cárceres ba Jornalista sira liuhosi konferénsia imprensa iha Edifísiu Ministériu Justisa, Dili.

Primeiru-Ministru  mós husu ba Ministériu Justisa  atu prepara rai hodi harii fatin ba negosiante fa’an katupa sira tanba balun oras ne’e hahú fa’an fali iha tasi ibun, área Ministériu Negósiu Estranjeiru no Kooperasaun nia oin.

“Ami sei prepara fatin ida para akomoda maluk sira fa’an katupa, tanba balun agora daudaun fa’an fali ona iha tasi ibun, edifísiu MNEK nia oin”, informa Ministru Manuel Cárceres.

Kona-ba rai atu oferese ba MOP ne’e, ohin Governante ne’e hasoru kedas Sekretáriu Estadu Terras Propriedade, atu konsulta ho Ministériu Obras Públika hodi hetan konkordánsia. Maibé, ba rai hodi oferese ba negosiante katupa sira sei iha konsultasaun ho Ministériu Administrasaun Estatál.

“Tempu besik rai rua ne’e bele rezolve ona”, afirma Ministru Justisa, Manuel Cárceres da Costa.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here