Ministru Justisa, Manuel Cárceres da Costa. Imajen/Egas Cristovão

DILI, 10 maiu 2019 (TATOLI) – Governu liuhosi Ministériu Justisa (MJ) sei re-ativa prizaun iha munisípiu Aileu, tanba espasu iha komarka Bekora la sufisiente ona atu akumula dadur sira.

“Kondisaun prizaun Bekora halo ha’u semana-semana tenke haka’as ba vizita hodi haree, prizaun Bekora nia kapasidade akumula de’it ema na’in 300, maibé agora iha 600, más labele haruka sira ba fatin seluk”, hatete Ministru Justisa, Manuel Cárceres da Costa, iha ninia knaar fatin, Kaikoli, ohin.

Nia haktuir: “Foin lalais Primeiru-Ministru fó instrusaun mai ha’u haruka ekipa tékniku gabinete Primeiru-Ministru ho diresaun servisu prizionál ba haree ona prizaun Aileu”.

Tuir Governante ne’e prizaun Aileu ne’ebé estabelese desde tempu okupasaun Indonézia kondisaun fiziku sei di’ak. ‘

“Prizaun Aileu ne’e sei di’ak hela, nune’e planu ba oin atu lori preju (dadur) balu iha Dili ba prizaun ne’e. Polítika ida seluk maka transfere ba prizaun Suai, munisípiu Kovalima no Glenu, munisípiu Ermera”, katak.

Nia akresenta antes halo transferénsia, sei estabalese kriteria ida katak dadur husi munisípiu Lautein labele muda ba Suai no Glenu, tanba sira iha dereitu atu hetan vizita husi nia família. Tanba muda ba Suai maka distánsia entre preju ho nia família dook.

Prizineiru ne’ebé sei muda ba Suai identifika husi munisípiu Bobonaru, Manufahi, Ainaru no Kovalima.

Muda ba prizaun Glenu mai husi Ermera rasik, Aileu, no Likisá, prizaun Bekora preju mai husi Dili rasik, Manatutu, Baukau, Lautein, Vikeke, no Rejiaun Administraiva Espesiál Oekusi Ambenu (RAEOA).

Manuel Cárceres da Costa halo mós komparasaun kondisaun prizaun iha Timór ho nasaun seluk, kondisaun Timór nian di’ik no respeita duni dereitu ema-nian, fó oportunidade atu prizioneiru sira reza ho oras, ne’e hotu eduka transformasaun mentalidade.

Dadaun ne’e, komarka Bekora akumula prizioneiru hamutuk 600, Suai la to’o 100, no Glenu 100.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here