Embaixadór Reino Olanda, Rob Swartbol (kahe hela tais iha kabaas), foto hamutuk ho oradór internasionál no membru KI iha serimónia Dili Diálogu Forum, sesta (10/5/2019). Imajen/mídia KI

DILI, 10 maiu 2019 (TATOLI)—Notísia falsu  (fake news/ hoax) sai preokupasaun boot ba mundu, ohin loron. Tanba ne’e, nasaun sira ida-idak iha nia maneira rasik atu kontrola notísia falsu sira ne’e hodi labele prejudika estabilidade no dezenvolvimentu.

Iha Reinu Olanda, ne’ebé forte tebes ho sira nia ‘ámbitu’ liberdade espresaun mós sente ona  efeitu hosi fake news ka hoax ne’e. Tanba ne’e, Estadu Reinu Olanda liuhosi nia Governu hahú dadaun ona halo kampaña nasionál iha sira

Embaixadór Reinu Olanda, Rob Swartbol, hato’o palestra iha Dili Diálogu Forum, Sesta (10/5/2019). Imajen/Francisco Simões

nia rai laran hodi sensibiliza nia povu atu hatene identifika notísia falsu sira.

“Iha tinan hirak liu-ba, ema buka notísia, maibé ho evolusaun ohin loron (mundu globalizasaun), halo ema la buka ona notísia. Ita tuur de’it iha fatin ‘kliik’ de’it notísia sai ona. Maibé, ninia  efeitu mak notísia sira ne’e balun loos no balun inventa mak ema bolu fake news ka hoax liuhosi mídia sosiál. Ita hotu preokupa,” hateten Embaixadór Reinu Olanda, Rob Swartbol,  iha nia breve palavra bainhira sai oradór iha semináriu internasionál Dili Diálogu Forum (DDF) ba loron daruak nian, ohin, ne’ebé organiza hosi Conselho de Imprensa Timor-Leste (KI-sigla tetun) iha Salaun São José, Vila Verde, Dili.

Embaixadór Rob Swartbol rekoñese katak, mídia sosiál ne’ebé ohin loron kria hosi grupu oioin, indivídu sira no mós ajente oioin nu’udár meius komunikasaun no informasaun. Maibé, iha mós ema anónimu sira aproveita hodi espalla informasaun falsu (fake news ka hoax) ne’ebé difísil tebes atu kontrola.

Maski nune’e, Rob Swartbol informa katak rai ida-idak no Estadu ida-idak iha nia maneira rasik atu hola medida. Ezemplu, iha Olanda rasik, governu halo sosializasaun no kampaña nasionál ho kolaborasaun mídia tradisionál sira publika no alerta lor-loron kona-ba informasaun falsu.

“Hakarak ka lakohi, fake news ka hoax ne’e fó ameasa boot tebes ba ita-nia demokrasia, ita-nia estabilidade no dezenvolvimentu.  Ha’u fiar, Estadu Timor-Lete iha nia mekanizmu rasik atu regula no tau matan atu povu ida ne’e la bele monu ba iha manobra notísia falsu sira ne’ebé bele periódika estabilidade no dezenvolvimentu,” hateten Embaixadór Rob Swartbol.

Iha Olanda rasik, Embaixadór Reinu Olanda ba Jakarta ne’e informa katak hahú halo ona diskusaun iha altu nível atu trata asuntu no preokupasaun kona-ba notísia falsu liuhosi maneira legál ruma.

“Iha ami-nia nasaun mídia tradisionál mós barak tebes no barak mak eziste tinan barak nia laran ona. Ami tane aas tebes iha independénsia editoriál no ami tenke buka regulamentu ne’ebé presiza forte atu Estadu uza hanesan kilat musan, oinsá julga notísia falsu ho ema sira ne’ebé kria notísia falsu,” afirma Embaixadór Rob Swartbol.

Oportunidade ne’e, Embaixadór Rob Swartbol mós aprezenta filme badak ho durasaun minutu rua (2), ne’ebé fó mensajen kona-ba governu Reinu Olanda   utiliza mídia sosiál no ho kolaborasaun mídia tradisionál sira hodi publika notísia falsu nu’udar informasaun ida ba povu katak notísia X ne’e falsu ka laloos.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here