Diretór Operasaun Aifaesa Gabriel da Costa,Imajen/Egas Cristovão

DILI, 10 maiu 2019 (TATOLI)-Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Costa, hatete, produtu komersiál sira ne’ebé besik ona liu prazu (expire) AIFAESA la halo intervensaun, maibé depois data ne’e remata maka sei halo atuasaun.

Bainhira seidauk liu prazu, AIFAESA labele halo buat ida tanba lei kona-ba ida ne’e sei iha ezbosu hela no parte jurídiku sei haree ida ne’e.

“Liu-liu ba ita-nia empreza sira maka tenke hatene katak sira-nia produtu ne’e fulan ida atu fora de prazu ona. Balu sira halo koordenasaun, sira hatene ne’e impaktu ba saúde públika entaun hasai no koordena ho AIFAESA bá halo destruisaun”,  esplika Gabriel da Costa, ohin, iha Edifísiu AIFAESA, Matadoru, Dili.

Nia dehan, iha mós empreza balu informa ba parte AIFAESA para fa’an produtu ho presu ne’ebé maka ki’ik, nune’e hotu lalais antes data ne’ebé determina. Maibé, AIFAESA só atua de’it kuandu produtu ne’e liu prazu tanba tuir lei liu prazu labele fa’an no rai iha armazein.

“Se hatene nia prazu ona no rai iha armazein tuir dekretu lei 23 iha artigu 41 hatete foti, hasai, halo prosesu no tenke destrui kedan”.

Gabriel da Costa relata, durante inspesaun ba produtu hemun no ai-han sira ne’ebé AIFAESA halo, iha empreza balu ne’ebé viola regra, maibé ba asuntu ne’e tanba rona de’it no la ka’er ho liman no laiha evidénsia entaun labele halo buat ida.

“To’o agora ami buka hela, dala barak iha empreza balu liuliu husi estranjeiru sira ne’e, sira-nia produtu ne’ebé haruka mai durante fulan, tinan hira nia laran kuandu produtu atu mate ona (expire), sira uza fali sira-nia maneira rasik halakon tiha data expire no tau fali data foun, ne’e sei akontese”.

Diretór ne’e relata iha empreza ida ne’ebé nia traballadór ida ne’ebé sira hapara nia kontratu halo keixa ba AIFAESA tanba antes ne’e nia mak halo serbisu hodi falsifika presu ka data, maibé bainhira AIFAESA bá haree produtu ne’e laiha tiha ona nune’e laiha evidénsia.

“Maibé departamentu operasaun sei kontinua esforsu atu buka tuir ita-nia empreza ne’ebé halo violasaun ne’e”, Gabriel da Costa tenik.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here