Embaixadór Italia iha Indonézia no Naun-rezidente mai Timor-Leste, Vittorio Sandalli hasai foto hamutuk ho autoridade timoroan sira. Foto TATOLI: Nelia Rosário

DILI, 09 maiu 2019 (TATOLI)-Embaixadór Italia iha Indonézia no Naun-rezidente mai Timor-Leste, Vittorio Sandalli hasoru malu ho Ministru Negósiu Estranjeiru no Kooperasaun (MNEK), Dionísio Babo Soares hodi hametin liután relasaun bilaterál entre Timor-Leste no Italia.

“Vizita ne’e ko’alia kona-ba relasaun bilaterál entre Timor-Leste ho Italia ne’ebé maka sai hanesan nasaun parseria ne’ebé fahe valór kona-ba demokrasia, direitu umanu no liberdade espresaun,” hateten Ministru Dionísio Babo Soares iha Edifísiu MNEK, Praia dos Coqueiros-Díli, kinta (09/05).

Italia ho Timor-Leste iha relasaun di’ak no antes ne’e ko-lidera reuniaun ne’ebé organiza husi Asembleia Jerál Nasaun Unida (UNGA-sigla inglés) kona-ba “moratorium pena de morte”.

Nune’e mós, Italia hanesan nasaun apoiante mós ba nasaun g7+ iha Nasaun Unida. Nasaun g7+ sira ne’e kompostu husi nasaun 20 inklui Timor-Leste. Tanba ne’e, iha reuniaun ne’e nasaun rua ne’e foka sira-nia diskusaun sobre relasaun entre nasaun rua ne’e ba oin no relasaun entre Timor-Leste ho nasaun sira seluk mós.

Iha enkontru ne’e mós, embaixadór italianu ho diplomata timoroan ne’e mós demonstra sira-nia sentidu amizade tanba iha kooperasaun lubun ida no suporta lubun ida ne’ebé nasaun rua ne’e hala’o ona, hanesan suporta Italia nian liuhusi prezensa EEU iha Timor-Leste, fó treinamentu diplomasia ba iha diplomata timoroan iha Roma, Italia no iha mós kompañia mina Italia nian ne’ebé halo operasaun iha tasi Timór.

“Ha’u garante katak ida ne’e la’ós ita-boot nia primeira vizita mai Timor-Leste,” dezeja Ministru Dionísio Babo ba diplomata italianu, Vittorio Sandalli.

Iha biban hanesan, Ministru Dionísio Babo Soares iha ho Embaixadór Itália iha Indonézia no Naun-rezidente mai Timor-Leste, Vittorio Sandalli diskute alende kooperasaun bilaterál maibé mós rejionál no kestaun multilaterál.

Jornalista       : Nelia Rosário

Editór             : Rafy Belo

HAKEREK NO HATÁN

Please enter your comment!
Please enter your name here