Diretór Jerál Água no Saneamentu (SAS), Gustavo da Cruz.

DILI, 09 maiu 2019 (TATOLI)—Diretór Jerál Água no Saneamentu (SAS) iha Ministériu Obra Públika, Gustavo da Cruz, promete sei garante sustentabilidade bee-moos iha sidade Dili.

 “Ko’alia kona-ba sustentabilidade distribuisaun bee ba ita-nia kliente tomak ami garante ninia sustentabilidade ho nia kualidade. Se akontese udan boot no mota tún, ami iha padraun operasionál ne’ebé utiliza hodi bele normaliza no karik iha bee-merak ami sei halo tratamentu,” Diretór Jerál ne’e ba Ajénsia TATOLI iha nia kna’ar fatin, Caicoli, kinta (9/5/2019).

Nia esplika, padraun operasionál ne’ebé governu iha, bainhira bee-merak maka’as liu rihun-ida (mais de mill), labele hatama iha prosesu tratamentu ho aimoruk hodi bee bele sai moos, maibé menus husi ne’e bele hafoin halo distribuisaun.

Nia  dehan, ida ne’e bolu bee gravitasaun tanba sidade Dili uza estasaun haat (4) hanesan mota bee-moos, mota Benamauk, mota Bekae nian no mota Maloa.

“Ita uza pursentu 30 (30%) de’it ba distribuisaun bee hosi estasaun 4 ne’e, maibé 70 % ita uza bee rai-okos (bee-posu). Entaun, bee rai-okos ho nia kle’an (naruk tún ba rai-okos) kuaze metru 60 to’o 100, tan ne’e laiha kontaminasaun ba mikróbiu sira. Ami iha laboratóriu periódika monitoriza kualidade bee,” Gustavo esplika.

Diretór ne’e rekoñese, iha impaktu iha tempu udan maibé rezerva kímiku sira menus. Kuandu aimoruk tratamentu ba bee-moos sufisiente entaun la fó implikasaun.

Nia subliña, durante ne’e uza aimoruk bee nian iha oin-rua. Ida, uza hodi hamate mikróbiu sira no aimoruk no ida seluk uza hodi netraliza  bee-merak hodi halo bee sai moos no halo distribuisaun ba komunidade.

Tuir informasaun ne’ebé Diretór Jerál Água no Saneamentu ne’e asesu hosi Diresaun Nasionál Meteorolojia katak Dili sei la akontese udan boot, tan ne’e sei la fó implikasaun ba bee-moos iha kapitál Dili.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here