Prezidente Repúblika Francisco Guterres Lú Olo, Kinta (9/5/2019), alerta ba Governu liuhosi Primeiru-Ministru, Taur Matan Ruak, atu fó asistensia no tratamentu saúde ba veteranu sira. Imajen/António Goncalves

DILI, 09 maiu 2019 (TATOLI)-Prezidente Repúblika, Francisco Guterres Lú Olo, rekomenda ba governu da-ualu atu bele kria mekanizmu di’ak hodi fó asisténsia no tratamentu saúde ba veteranu sira ne’ebé to’o ohin loron seidauk hetan atensaun.

Prezidente Repúblika hato’o nia pedidu ne’e diretamente ba Primeiru-Ministru, Taur Matan Ruak, liuhosi enkontru semanál entre parte rua, ohin, iha Palásiu Prezidente Nicolau Lobato, Ai-Tarak Laran, Bairru Pite, Dili.

Primeiru-Ministru rekoñese katak, dezde uluk kedas Ministériu Saúde estabelese ona Postu Saúde ida suku hotu-hotu no kompleta ho médiku na’in ida, maibé kondisaun ne’e seidauk bele akumula atu fó tratamentu  saúde ida espesífiku ba veteranu sira ne’ebé sofre torturasaun no moris ho kondisaun bala musan iha isin.

“Prezidente Repúblika levanta kona-ba saúde veteranu sira nian hodi alerta atu governu fó atensaun. Ha’u toma nota ba preokupasaun Prezidente Repúblika nian atu haree to’ok ba oin ne’e saida maka governu sei halo”, informa PM Taur Matan Ruak, hodi responde jornalista sira hafoin enkontru ho Xefe Estadu.

Taur Matan Ruak esplika tan, Governu liuhosi ministériu saúde oras ne’e estabelese ona ekipa junta médika hodi fó tratamentu espesiál ba veteranu sira iha rai laran no estranjeiru.

Prezidente Repúblika preokupa tanba maioria veteranu sira iha área remotas seidauk asesu programa governu ne’e hodi trata sira nia saúde.

Jornalista   : Agapito dos Santos

Editór           : Francisco Simões

HAKEREK NO HATÁN

Please enter your comment!
Please enter your name here