ONGV. Imajen espesiál

DILI, 9 maiu 2019 (TATOLI) – Óspital Nasionál Guido Valadares (ONGV) liu husi banku urjénsia iha fulan-abríl tinan ne’e rejista númeru kazu moras dengue hamutuk 67, inklui na’in rua mak lakon vida.

Xefe Departamentu banku urjénsia, Nilton da Silva, hateten total númeru moras pasiente ne’ebé baixa iha banku urjensia besik rihun 5.

“Totál pasiente fulan-abríl besik rihun lima, husi númeru ne’e; adultu, pediátria, maternidade, kazu violénsia doméstika no asidente”, informa Xefe Departamentu Banku Urjénsia ONGV, Nilton da Silva, ba jornalista sira iha Bidau Toko Baru, ohin.

Nia hatutan: “Husi númeru sira ne’e ba iha pediátria; kazu ho isin manas. Diagnostika ne’ebé ami dokumenta hatudu dengue sei sai hanesan númeru primeiru, maioria kazu dengue ne’e akontese ba labarik”.

Nilton da Silva afirma iha guiaun ne’ebé fó sai husi departamentu pediátria no internamentu katak bainhira ema mai ho suspeitu isin manas loron tolu to’o lima tenke halo tratamentu; tantu ba labarik no ema boot.

“Kona-ba moras dengue, iha ami nia departamentu iha fulan-abríl nain rua maka mate, ne’e labarik, pasiente ne’e grave tiha ona maka família lori mai, máske ami fó ona tratamentu másimu tuir ami nia kbi’it. Pasiente ne’ebé ami identifika pozitivu dengue tenke baixa”, katak.

Tuir Nilton da Silva, susuk ne’ebé mosu hodi hamosu moras dengue sente livre liu moris iha tempu udan, li-liu bee nalihun, tanba dadaun ne’e tempu udan, fasilmente susuk moris.

Relasaun ho númeru pasiente barak, espasu iha sala emerjensia la sufiente atu akumula ema hotu.

Kona-ba kualidade tratamentu, lideransa banku urjénsia ne’e rekoñese sira hasoru difilkudade tebes, tanba meiu la sufiente; en termu rekursu umanu no mós ekipamentu.

Dadaun ne’e, médiku timoroan iha sala urjénsia hamutuk na’in lima, médiku Kubanu na’in 5.

Jornalista: Antónia Gusmão

Editora: Rita Almeida

Lee mós notísia ida ne’e :http://www.tatoli.tl/2019/05/smd-sei-reativa-atividade-rega-susuk-iha-semana-oin/

HAKEREK NO HATÁN

Please enter your comment!
Please enter your name here